वैभवच्या ८४ चेंडूत १९० धावा....विजय हजारे ट्रॉफीमध्ये नवीन विश्वविक्रम

Vaibhav scored 190 runs off 84 balls १४ वर्षीय वैभव सूर्यवंशीने विजय हजारे ट्रॉफी २०२५-२६ च्या प्लेट ग्रुप सामन्यात अरुणाचल प्रदेशविरुद्ध अविश्वसनीय कामगिरी करत क्रिकेटविश्वात धुमाकूळ उडवला आहे. फक्त ८४ चेंडूत त्याने १९० धावा केल्या, त्यात १६ चौकार आणि १५ षटकारांचा समावेश आहे. या धमाकेदार खेळीमुळे त्याचा स्ट्राईक रेट २२६.१९ पर्यंत पोहोचला, ज्यामुळे तो लिस्ट ए क्रिकेटमधील सर्वात वेगवान आणि तरुण फलंदाज ठरला.

 

 

वैभवने या सामन्यात फक्त ३६ चेंडूत शतक पूर्ण केले आणि फक्त ५४ चेंडूत १५० धावा केल्या, ज्याद्वारे त्याने दक्षिण आफ्रिकेच्या महान फलंदाज एबी डिव्हिलियर्सची रेकॉर्ड मागे टाकली. डिव्हिलियर्सने यापूर्वी लिस्ट ए सामन्यात १५० धावा ६४ चेंडूत केल्या होत्या, तर वैभवने त्याला सहज मागे टाकले. ही वैभवची लिस्ट ए क्रिकेटमधील पहिली शतकीय खेळी आहे, पण आयपीएल, युवा एकदिवसीय, युवा कसोटी, भारत अ, सय्यद मुश्ताक अली ट्रॉफी, १९ वर्षांखालील आशिया कप आणि विजय हजारे ट्रॉफीमध्ये त्याने आतापर्यंत अनेक शतक झळकावली आहेत. या डावखुर्या आणि धडाकेबाज फलंदाजाच्या खेळामुळे भारतीय क्रिकेटमध्ये नवा उभरता तारा चमकू लागला आहे.