सायबेरियात थंडीचा कहर; याकुतियात तापमान उणे ५६ अंशांवर video

Yakutia temperature in minus 56 degrees रशियाच्या सायबेरिया भागात प्रचंड थंडीने अक्षरशः कहर केला असून, यंदाच्या हिवाळ्यातील सर्व जुने विक्रम मोडले गेले आहेत. जगातील अत्यंत थंड प्रदेशांपैकी एक असलेल्या याकुतिया प्रांतात तापमान थेट उणे ५६ अंश सेल्सिअसपर्यंत खाली घसरले असून, सध्या हे पृथ्वीवरील सर्वात कमी तापमान असल्याचे मानले जात आहे. परिस्थिती इतकी गंभीर झाली आहे की प्रशासनाने शाळा बंद ठेवण्याचा निर्णय घेतला असून नागरिकांना घराबाहेर न पडण्याचे आवाहन करण्यात आले आहे. हवामान विभागाने दिलेल्या इशाऱ्यानुसार, पुढील काही दिवसांत तापमान उणे ६० अंश सेल्सिअसपर्यंत घसरण्याची शक्यता आहे.

 

 

 

याकुतियातील तिक्सी या किनारी गावात परिस्थिती अधिकच भयावह आहे. गेल्या तीन दिवसांपासून येथे सतत हिमवादळ सुरू असून, जोरदार वाऱ्यांसह प्रचंड बर्फवृष्टी होत आहे. संपूर्ण परिसर जाड बर्फाच्या थराने झाकला गेला असून अनेक घरांच्या दारापर्यंत बर्फ साचला आहे. त्यामुळे अनेक नागरिक घरातच अडकून पडले आहेत. याकुतिया हा अतिशय विस्तीर्ण आणि कठोर हवामान असलेला प्रदेश म्हणून ओळखला जातो. हा जगातील सर्वात थंड वस्ती असलेल्या भागांपैकी एक आहे. येथे हिवाळा फारच दीर्घकाळ टिकतो आणि तापमान सामान्यतः उणे ४० ते उणे ५० अंश सेल्सिअस दरम्यान राहते. काही वेळा ते उणे ६० अंशांपर्यंतही घसरते. ओयम्याकोन हे गाव जगातील सर्वात थंड वस्ती म्हणून प्रसिद्ध आहे. विशेष म्हणजे, उन्हाळ्यातही येथे हवामान फारसे उष्ण होत नाही आणि क्वचितच तापमान २० अंश सेल्सिअसच्या आसपास पोहोचते.

 

 

 

 

दरम्यान, हवामान तज्ज्ञांनी स्पष्ट इशारा दिला आहे की ही थंडी तात्काळ ओसरण्याची शक्यता नाही. उलट, पुढील काही दिवसांत परिस्थिती आणखी गंभीर होऊ शकते. नागरिकांना अनावश्यक प्रवास टाळण्याचा, घरातच राहण्याचा आणि उबदार कपडे तसेच हीटरचा वापर करण्याचा सल्ला देण्यात आला आहे. याकुतियामध्ये तीव्र थंडी नवीन नाही, मात्र यंदा थंडी आणि हिमवादळांच्या तीव्रतेमुळे संपूर्ण जनजीवन ठप्प झाले आहे.