पत्नीला कालव्याच्या पाण्यात ढकलले

attempt-to-kill-wife : नात्यातील विश्वासाचा भंग करणारी आणि माणुसकीला काळीमा फासणारी धक्कादायक घटना तिवसा तालुक्यात घडली असून, पत्नीला दुचाकीवरून आत्याकडे सोडण्याची बतावणी करून पतीनेच तिला पाण्याने भरून वाहणार्‍या कॅनॉलमध्ये ढकलल्याचा संतापजनक प्रकार उघडकीस आला आहे. मात्र नियतीने साथ दिल्याने आणि कॅनॉलमधील एका झाडाचा आधार मिळाल्याने त्या महिलेचा जीव थोडक्यात बचावला. या प्रकरणी तिवसा पोलिसांनी तातडीने कारवाई करत आरोपी पतीसह एका अल्पवयीन बालकास अटक केली आहे.

 

 

 

 

 

 

या घटनेत अटक करण्यात आलेल्यांमध्ये शिवा सवले (रा. करजगाव) व एक १७ वर्षीय अल्पवयीन युवकाचा समावेश आहे. तिवसा शहरापासून सुमारे १५ किलोमीटर अंतरावर असलेल्या पिंपळखुटा (मोठा) नजीकच्या कॅनॉलजवळ ही थरारक घटना घडली. प्राप्त माहितीनुसार, फिर्यादी २१ वर्षीय महिला व तिचा पती काही कारणास्तव विभक्त राहत होते. मात्र दोघांमध्ये फोनद्वारे संवाद सुरू होता. दरम्यान, फिर्यादी महिला आकोट येथे आपल्या आत्याकडे जाण्यास निघाल्याची माहिती तिने पतीला दिली. यावर आरोपी पती शिवा याने मीच तुला सोडून देतो असे सांगून तिला दुचाकीवर बसविले. त्याच्यासोबत एका अल्पवयीन युवकालाही त्याने सोबत घेतले.

 

 

सातरगाव मार्गे प्रवास करत असताना पिंपळखुटा नजीकच्या कॅनॉलजवळ आरोपीने दुचाकी थांबवली. त्यानंतर अल्पवयीन मुलाच्या मदतीने फिर्यादी महिलेचे हात-पाय पकडून तिला थेट कॅनॉलमध्ये फेकून देत जीवे मारण्याचा प्रयत्न केला. घटनेनंतर दोन्ही आरोपी घटनास्थळावरून पळ काढण्यात यशस्वी झाले. मात्र म्हणतात ना, देव तारी, त्याला कोण मारी, याचाच प्रत्यय या घटनेत आला. कॅनॉलमध्ये पडताच वाहत्या पाण्यात काही अंतरावर असलेल्या एका झाडाचा आधार फिर्यादी महिलेला मिळाला आणि ती कसाबसा स्वतःचा जीव वाचवू शकली. कॅनॉलमधून बाहेर येताच ती जवळच्या शेतात गेली व तेथील एका शेतकर्‍याला संपूर्ण हकीकत सांगितली.

 

 

यानंतर तिने तिवसा पोलिस ठाणे गाठून घडलेल्या प्रकाराची तक्रार दाखल केली. फिर्यादीच्या तक्रारीवरून तिवसा पोलिसांनी तात्काळ हालचाली करीत आरोपी पती शिवा सवले व संबंधित अल्पवयीन युवकास ताब्यात घेऊन त्यांच्याविरुद्ध गुन्हा दाखल केला आहे. या प्रकरणाचा अधिक तपास तिवसा पोलीस स्टेशनचे ठाणेदार गोपाल उपाध्याय यांच्या मार्गदर्शनाखाली एपीआय अमोल मुळे करीत आहेत.