धुक्यामुळे राजधानी ठप्प...११० गाड्या उशिरा तर अनेक उड्डाणांना विलंब

Smog wreaks havoc in Delhi नवी दिल्ली आणि परिसरात दाट धुक्याने जोरदार कहर केला असून जनजीवन पूर्णपणे विस्कळीत झाले आहे. दिल्ली-एनसीआरमधील अनेक भागांमध्ये सकाळच्या सुमारास दृश्यमानता अत्यंत कमी, तर काही ठिकाणी जवळपास शून्यावर पोहोचली आहे. संपूर्ण परिसर धुक्याच्या जाड चादरीत गुरफटल्याचे चित्र दिसत असून रस्ते, रेल्वे आणि हवाई वाहतूक यावर त्याचा मोठा परिणाम झाला आहे. धुक्यामुळे रस्त्यांवरील वाहतूक संथ झाली असून वाहनांना अतिशय सावकाश हालचाल करावी लागत आहे. रेल्वे वाहतुकीवरही याचा मोठा फटका बसला असून राजधानी एक्सप्रेस, तेजस, दुरांतोसह सुमारे ११० गाड्या उशिराने धावत असल्याची माहिती रेल्वे अधिकाऱ्यांनी दिली आहे. अनेक प्रवाशांना तासन्‌तास प्रतीक्षा करावी लागत असल्याने गैरसोय वाढली आहे.

 

 

 

हवाई वाहतुकीलाही दाट धुक्याचा फटका बसला आहे. इंदिरा गांधी आंतरराष्ट्रीय विमानतळावर उड्डाणे आणि लँडिंगमध्ये अडचणी येत असून अनेक विमाने उशिराने धावत आहेत. विमानतळ प्रशासनाने स्पष्ट केले आहे की सध्या श्रेणी-३ परिस्थितीत उड्डाणे सुरू आहेत, त्यामुळे उशीर होण्याची किंवा काही उड्डाणे रद्द होण्याची शक्यता आहे. प्रवाशांच्या मदतीसाठी ग्राउंड स्टाफ तैनात करण्यात आला असून, प्रवाशांनी त्यांच्या संबंधित एअरलाइनशी संपर्क साधून अद्ययावत माहिती घ्यावी, असे आवाहन करण्यात आले आहे.

मिळालेल्या माहितीनुसार, आयजीआय विमानतळ परिसरात दृश्यमानता सुमारे ८०० मीटरपर्यंत मर्यादित आहे. याचा परिणाम म्हणून इंडिगो एअरलाइन्सने १३ उड्डाणे रद्द केली असून १०० हून अधिक उड्डाणांना विलंब झाला आहे. दिल्लीहून जयपूरसह इतर शहरांकडे जाणाऱ्या विमानांच्या वेळापत्रकावर याचा मोठा परिणाम झाला आहे. हवामान विभागानुसार, वर्षाच्या अखेरीस उत्तर भारतात दाट धुक्याची परिस्थिती निर्माण झाली आहे. २९ डिसेंबर रोजी ‘अत्यंत दाट धुके’, ३० डिसेंबर रोजी ‘दाट धुके’ तर ३१ डिसेंबर रोजी ‘मध्यम धुके’ असा इशारा देण्यात आला होता. पुढील काही दिवसांत एनसीआरमध्ये ढगाळ वातावरण राहण्याची शक्यता असून १ जानेवारी रोजी हलका ते रिमझिम पाऊस पडण्याचा अंदाज वर्तवण्यात आला आहे. त्या दिवशी कमाल तापमान सुमारे २१ अंश सेल्सिअस तर किमान तापमान १० अंश सेल्सिअसच्या आसपास राहण्याची शक्यता आहे.