पंजाब किंग्ज संघाने शिखर गाठले!

IPL 2025 : पंजाब किंग्ज संघाने एका रोमांचक सामन्यात राजस्थान रॉयल्सचा १० धावांनी पराभव केला आणि यासह त्यांनी प्लेऑफकडे वाटचाल केली आहे. या सामन्यात पंजाब किंग्जचा कर्णधार श्रेयस अय्यरने नाणेफेक जिंकून प्रथम फलंदाजी करण्याचा निर्णय घेतला. यानंतर पंजाबने २१९ धावा केल्या, ज्याच्या प्रत्युत्तरात राजस्थान रॉयल्स फक्त २०९ धावा करू शकले. पंजाबकडून हरप्रीत ब्रार, शशांक सिंग आणि नेहल वढेरा यांनी चांगली कामगिरी केली.

 

 

 

 

पंजाब किंग्ज आणि राजस्थान रॉयल्स यांच्यातील हा सामना जयपूरच्या मैदानावर खेळवण्यात आला, ज्यामध्ये पंजाबने प्रथम फलंदाजी करत २१९ धावा केल्या. यासह, जयपूरच्या मैदानावर आयपीएलमध्ये सर्वाधिक धावा करणारा संघ बनला आहे. त्यांनी मुंबई इंडियन्स आणि सनरायझर्स हैदराबादला मागे टाकले आहे. यापूर्वी येथे सर्वाधिक धावा करण्याचा विक्रम एमआय आणि एसआरएचच्या नावावर होता. जयपूरमध्ये या दोन्ही संघांनी २१७-२१७ धावा केल्या होत्या. आता पंजाब संघाने त्यांना मागे टाकले आहे आणि जयपूरमध्ये सर्वाधिक आयपीएल धावा करणारा संघ बनला आहे आणि अव्वल स्थानावर पोहोचला आहे.

 

 

वैभव सूर्यवंशी आणि यशस्वी जैस्वाल यांनी राजस्थान रॉयल्स संघाला दमदार सुरुवात करून दिली. या दोन्ही खेळाडूंनी पहिल्या विकेटसाठी ७६ धावांची भागीदारी केली. पण हे खेळाडू बाद होताच राजस्थानची फलंदाजी कोसळली. सूर्यवंशीने ४० धावा केल्या. त्याच वेळी, जयस्वालने २५ चेंडूत ५० धावा केल्या, ज्यात ९ चौकार आणि एका षटकाराचा समावेश होता. संजू सॅमसन आणि रियान पराग यांना चांगली खेळी करता आली नाही. ध्रुव जुरेलने ३१ चेंडूत ५३ धावा केल्या. शिमरॉन हेटमायर पुन्हा एकदा चांगली कामगिरी करण्यात अपयशी ठरला आणि त्याला फक्त ११ धावा करता आल्या. पंजाब किंग्जकडून हरप्रीत ब्रारने चार षटकांत २२ धावा देत तीन महत्त्वाच्या विकेट्स घेतल्या.

 

 

पंजाब किंग्जची सुरुवात खराब झाली कारण प्रियांश आर्य (९ धावा) आणि प्रभ्सिमसन सिंग (२१ धावा) त्यांना मोठ्या धावसंख्येत रूपांतरित करण्यात अपयशी ठरले. या दोन्ही फलंदाजांना तुषार देशपांडेने बाद केले. यानंतर मिचेल ओवेन खाते न उघडताच बाद झाला. त्यानंतर श्रेयस अय्यर आणि नेहल वधेरा यांनी धावा करण्याची जबाबदारी घेतली. या दोन्ही खेळाडूंनी संघाला कठीण परिस्थितीतून बाहेर काढले. नेहलने ७० धावांची खेळी केली, ज्यामध्ये ५ चौकार आणि ५ षटकारांचा समावेश होता. श्रेयस अय्यरने ३० धावांचे योगदान दिले.

 

शेवटी, शशांक सिंगने स्फोटक फलंदाजी केली. त्याने ३० चेंडूत ५९ धावा केल्या, ज्यात पाच चौकार आणि तीन षटकारांचा समावेश होता. या खेळाडूंमुळेच पंजाब किंग्जचा संघ २१९ धावांपर्यंत पोहोचू शकला. राजस्थानचे गोलंदाज सपशेल अपयशी ठरले आणि त्यांना चांगली कामगिरी करता आली नाही.