पाकिस्तान क्रिकेट संघ जाहीर, पण 'हे' खेळाडू बाहेर!

Pakistani Team : पुढील मालिकेसाठी पाकिस्तान क्रिकेट संघाची घोषणा करण्यात आली आहे. विशेष म्हणजे बाबर आझम आणि मोहम्मद रिझवान व्यतिरिक्त शाहीन शाह आफ्रिदीला त्यात स्थान देण्यात आलेले नाही. पाकिस्तानी संघ या महिन्यात बांगलादेशविरुद्ध टी-२० मालिका खेळण्याची तयारी करत आहे. यासाठी सलमान अली आगाला पुन्हा एकदा कर्णधार बनवण्यात आले आहे. तीन मोठ्या खेळाडूंना वगळल्याने प्रश्न उपस्थित होत असताना, पीसीबी निवड समिती काय विचार करते हे पाहणे बाकी आहे.

 

 

 

 

पाकिस्तान क्रिकेट बोर्डाने (पीसीबी) बांगलादेशविरुद्धच्या टी-२० मालिकेसाठी संघ जाहीर केला आहे. पूर्वी ही मालिका पाच सामन्यांची असणार होती, पण आता ती फक्त तीन सामन्यांची करण्यात आली आहे. या मालिकेसाठी पाकिस्तानच्या १६ खेळाडूंना संघात स्थान देण्यात आले आहे. तथापि, त्यात बाबर, शाहीन आणि रिझवान यांची नावे नाहीत. मालिकेतील सर्व सामने लाहोरच्या गद्दाफी स्टेडियमवर खेळवले जातील. एकेकाळी मालिका अनिश्चित होती, परंतु पीसीबी आणि बीसीबी यांच्यातील बैठकीनंतर तीन सामन्यांच्या मालिकेला हिरवा कंदील देण्यात आल्याचे कळले आहे.

 

 

पाकिस्तान आणि बांगलादेश यांच्यातील ही मालिका आधी २५ मे पासून सुरू होणार होती, परंतु आता ती पुढे ढकलण्यात आली आहे, नवीन वेळापत्रक लवकरच जाहीर केले जाईल. पीएसएल काही दिवसांसाठी स्थगित करण्यात आले होते, त्यामुळे ते पुन्हा वेळापत्रकात बदल करावे लागले. या मालिकेसाठी सलमान अली आगा यांच्याकडे कर्णधारपदाची जबाबदारी सोपवण्यात आली आहे, तर शादाब खान उपकर्णधारपदाची भूमिका साकारताना दिसणार आहेत.

 

टी-२० मालिकेसाठी पाकिस्तान क्रिकेट संघ: सलमान अली आगा (कर्णधार), शादाब खान (उपकर्णधार), अबरार अहमद, फहीम अशरफ, फखर जमान, हारिस रऊफ, हसन अली, हसन नवाज, हुसैन तलत, खुशदिल शाह, मोहम्मद हारिस (विकेटकीपर), मोहम्मद वसीम जूनियर, मुहम्मद इरफान खान, नसीम शाह, साहिबजादा फरहान (विकेटकीपर), सैम अयूब.