बिहार निवडणुकीपूर्वी, मंगनी लाल मंडल बनले राजदचे नवे प्रदेशाध्यक्ष

RJD-Mangani Lal Mandal : बिहारचे माजी कॅबिनेट मंत्री मंगनी लाल मंडल यांची आरजेडीचे नवे प्रदेशाध्यक्ष म्हणून निवड झाली आहे. गुरुवारी पाटणा येथे झालेल्या राजद राज्य परिषदेच्या बैठकीत मंगनी लाल मंडल यांची प्रदेशाध्यक्ष म्हणून निवड झाल्याचे औपचारिकपणे घोषित करण्यात आले.

 

 

 

 

पाटणा येथे झालेल्या आरजेडी राज्य परिषदेच्या बैठकीत लालू यादव, राबडी देवी आणि तेजस्वी यादव हे देखील उपस्थित होते. याशिवाय मीसा भारती यांच्यासह पक्षाचे अनेक ज्येष्ठ नेतेही उपस्थित होते. लालू यादव आणि तेजस्वी यांच्या उपस्थितीत मंगनी लाल मंडल यांची प्रदेशाध्यक्षपदी निवड झाल्याचे घोषित करण्यात आले. मंडल यांच्याशिवाय या पदासाठी इतर कोणीही उमेदवारी अर्ज दाखल केला नव्हता. त्यामुळे ते बिनविरोध प्रदेशाध्यक्ष झाले आहेत.

 

 

मंगनी लाल यांनी ८० वर्षीय जगदानंद सिंग यांची जागा घेतली आहे. मंडल हे अत्यंत मागासवर्गीय (EBC) वर्गातून येतात, जे राज्याच्या लोकसंख्येच्या ३६ टक्के आहेत. राज्यातील एका मोठ्या राजकीय पक्षाचे नेतृत्व करणारे ते या मोठ्या लोकसंख्या गटातील पहिले व्यक्ती आहेत. तेजस्वी यादव यांनी याला ऐतिहासिक म्हटले आहे.

 

 

आरजेडीने यापूर्वीही दलित, ओबीसी, मुस्लिम आणि उच्च जातीच्या नेत्यांना प्रदेशाध्यक्षपदी नियुक्त केले आहे. मंडल हे ईबीसी समुदायातील पहिले व्यक्ती आहेत. खरंतर, बिहार विधानसभा निवडणुकीपूर्वी राजद जातीय समीकरणे दुरुस्त करण्यात व्यस्त आहे. मुस्लिम आणि यादव मतपेढींवर पक्षाची चांगली पकड आहे, परंतु जर त्यांना सत्तेत येण्याचे स्वप्न पूर्ण करायचे असेल तर त्यांना इतर जातींचाही पाठिंबा आवश्यक आहे.