पावसाळी अधिवेशनात शिवसेनेचं ‘मी मराठी’ आंदोलन गाजलं

Maharashtra Monsoon Session 2025 महाराष्ट्र विधिमंडळाच्या पावसाळी अधिवेशनाला आजपासून (सोमवार) औपचारिक सुरुवात झाली असून, पहिल्याच दिवशी विधानभवनाच्या परिसरात सरकारविरोधी वातावरण रंगताना दिसून आले. विरोधकांनी आक्रमक भूमिका घेत अधिवेशनाच्या सुरुवातीलाच सरकारला घेरण्याचा प्रयत्न केला. विशेषतः शिवसेना ठाकरे गटाच्या आमदारांनी 'मी मराठी' अशी टोपी परिधान करत घोषणाबाजी करत लक्ष वेधून घेतले.

 

 

 

 

 

अधिवेशन सुरू होण्यापूर्वीच ठाकरे गटाचे आमदार विधानभवनाच्या पायऱ्यांवर ‘मी मराठी’ टोपी घालून जमले होते. या आंदोलनात विधान परिषदेतील विरोधी पक्षनेते अंबादास दानवे यांनी भाजप प्रदेशाध्यक्ष चंद्रशेखर बावनकुळे यांना स्वतः ‘मी मराठी’ टोपी घालून दिली, ज्यामुळे उपस्थितांचे लक्ष त्यांच्याकडे वेधले गेले. यावेळी दोघांमध्ये हस्तांदोलनही झाले. या उपक्रमात ठाकरे गटाचे प्रमुख नेते आदित्य ठाकरे, आमदार भास्कर जाधव आणि अजय चौधरी हेही सहभागी होते.या उपक्रमातून मराठी अस्मितेचा मुद्दा पुन्हा एकदा केंद्रस्थानी आणण्याचा ठाकरे गटाचा प्रयत्न असल्याचे जाणवत होते. विधानभवनाच्या पायऱ्यांवर झालेल्या घोषणाबाजीमुळे वातावरण काही काळ पेटले होते.

 

 

 

दुसऱ्या बाजूला, विधिमंडळाच्या सभागृहात मुख्यमंत्री एकनाथ शिंदे यांनी नुकतेच मंत्रीपदाची शपथ घेतलेल्या छगन भुजबळ यांचा परिचय करून दिला. राष्ट्रवादी काँग्रेसच्या अजित पवार गटाचे नेते असलेल्या भुजबळांचा मंत्रिमंडळात समावेश झाल्यानंतर आज अधिवेशनाच्या पहिल्याच दिवशी त्यांची औपचारिक ओळख सभागृहात करून देण्यात आली.आज अधिवेशनाच्या पहिल्या दिवशी नाशिक-त्र्यंबकेश्वर कुंभमेळा प्राधिकरण संबंधित अध्यादेश पटलावर ठेवण्यात आला. याशिवाय, २०२५-२६ या आर्थिक वर्षाच्या पुरवणी मागण्याही सादर करण्यात आल्या. यानंतर विधानसभेत शोकप्रस्ताव मांडण्यात आला आणि आजच्या कामकाजाचा समारोप करण्यात आला.

 

 

 

 

दरम्यान, Maharashtra Monsoon Session 2025  शिवसेना पक्षप्रमुख उद्धव ठाकरे हे देखील लवकरच विधानभवनात दाखल होणार आहेत. अधिवेशनाच्या पार्श्वभूमीवर ते दुपारी २ वाजता आझाद मैदान येथे विरोधकांच्या आंदोलनात सहभागी होणार असून, त्यानंतर तीन वाजता सिल्वर ओक येथेही उपस्थित राहतील. त्यांच्या उपस्थितीमुळे विरोधकांच्या रणनीतीला अधिक धार मिळण्याची शक्यता आहे.शिवसेना ठाकरे गटाने घेतलेली आक्रमक भूमिका, विरोधकांची एकजूट आणि सरकारविरोधातील वाढते असंतोष लक्षात घेता, यंदाचे पावसाळी अधिवेशन वादळी ठरण्याची शक्यता वर्तवली जात आहे. मराठी अस्मितेपासून ते मंत्रीमंडळातील फेरबदल, पुरवणी मागण्या, कुंभमेळा प्राधिकरण आणि विविध स्थानिक प्रश्न हे विषय अधिवेशनात गाजण्याची चिन्हे आहेत.