ज्येष्ठ दिग्दर्शक व एडिटर व्ही. एन. मयेकर यांचे निधन

V. N. Mayekar  भारतीय चित्रपटसृष्टीतील एक महत्त्वाचं नाव असलेले ज्येष्ठ दिग्दर्शक व एडिटर व्ही. एन. मयेकर यांचं २६ जुलै २०२५ रोजी निधन झालं. त्यांच्या मृत्यूचं नेमकं कारण अद्याप स्पष्ट झालेलं नाही. त्यांच्या निधनाने संपूर्ण मराठी चित्रपटसृष्टीवर शोककळा पसरली आहे. अनेक कलाकार, तंत्रज्ञ व सिनेप्रेमींनी त्यांना भावपूर्ण श्रद्धांजली अर्पण केली आहे.

 

 

व्ही. एन. मयेकर हे केवळ एक दिग्दर्शक वा एडिटर नव्हते, तर चित्रपट निर्मितीच्या तांत्रिक प्रक्रियेचे जाणकार होते. त्यांनी आपल्या एडिटिंग कौशल्याच्या जोरावर अनेक चित्रपटांना वेगळी ओळख मिळवून दिली. त्यांच्या हाताखाली अनेक नवोदित कलाकार व तंत्रज्ञ घडले. त्यामुळे ते केवळ सिनेसृष्टीतील तज्ज्ञच नव्हते, तर प्रेरणास्थानही ठरले.मराठीसह हिंदी चित्रपटांमध्येही त्यांनी महत्त्वपूर्ण योगदान दिलं. ‘घायल’, ‘घातक’, ‘वास्तव’, ‘विवाह’ यांसारख्या हिंदी चित्रपटांसाठी त्यांनी एडिटिंग केलं. यातील ‘घायल’ आणि ‘घातक’ या चित्रपटांसाठी त्यांना फिल्मफेअर पुरस्काराने सन्मानित करण्यात आलं. तर ‘आई’, ‘श्रीमंत दामोदर पंत’ यांसारख्या मराठी चित्रपटांमध्येही त्यांनी भरीव कामगिरी केली.

मयेकर यांचे एडिटिंग हे केवळ दृश्यांची संगती नव्हती, तर कथेला एक नवाच आयाम देण्याचे त्यांचे कौशल्यच होते. त्यांच्या शैलीमुळे चित्रपट अधिक प्रभावी बनत असे. त्यांच्या जाण्याने मराठी चित्रपटसृष्टीने एक अनुभवी, कुशल व दूरदृष्टी असलेला मार्गदर्शक गमावला आहे. त्यांच्या योगदानाचे स्मरण सदैव राहील.