ऋषीमुनींच्या तपोभूमीत शिवभक्तांचा मेळा

gondia-shiva-temple जिल्हा मुख्यालयापासून काही अंतरावर गोरेगाव तालुक्यातील बोळुंदा गावाजवळ नागझिरा व्याघ्र प्रकल्पाच्या कुशीत असलेल्या पोंगेझरा प्राचीन शिवालयात अनेक ऋषीमुनींनी तपसाधना केली आहे. त्यामुळे या तपोभूमीत वर्षभर भाविकांच्या रांगा लागत असतात. त्यातच महाशिवरात्री व श्रावण महिन्यात शिवभक्तांची चांगलीच रेलचेल असते. दरम्यान, आज, सोमवार, २८ जुलै रोजी शुक्ल श्रावण मासातील पहिला श्रावण सोमवार असल्याने या तपोभूमीत शिवभक्तांचा मेळा राहणार असून नागझिर्‍याच्या घनदाट जंगलात ‘हर हर महादेव’चा गजर होणार आहे.

 

 

 

गोंदिया जिल्हा मुख्यालयापासून सुमारे १५ ते २० किमी अंतरावर नागझिरा व्याघ्र प्रकल्पाच्या जंगलात बोळुंदा प्राचीन पोंगेझरा, गायमुख देवस्थान आहे. रामायण काळापासून या देवस्थानाला महत्त्व असून रामायण काळात महर्षी मेघा यांचे आश्रम याच ठिकाणी होते. यानंतर महर्षी मुक्तानंद स्वामी, रामजी महाराज, अनेकानंद स्वामी या संतांनीही याच ठिकाणी तपश्चर्या केली. त्यामुळे या देवस्थानाला तपोभूमी ही ख्याती प्राप्त झाली. gondia-shiva-temple निसर्गरम्य जंगल परिसर डोंगराच्या पायथ्याशी हे देवस्थान आहे. गायमुखातून निरंतर शुद्ध पाणी वाहत असून काही अंतरापर्यंतच ते वाहताना दिसून येते, त्यामुळे हे आश्चर्य पाहण्यासाठीदेखील भाविकांसह पर्यटकांचा कल या देवस्थानाकडे असतो. दरम्यान, वर्षभर विविध धार्मिक कार्यक्रमाची रेलचेल या तपोभूमीत होत असतानाच महाशिवरात्री, मकर संक्राती, हनुमान जयंती, चैत्र नवरात्री व श्रावण मासामध्ये अनेक कार्यक्रम साजरे केले जातात. विशेष म्हणजे, श्रावण मासाच्या निमित्ताने दर सोमवारी विशेष पूजन, महाभिषेक आदी कार्यक्रमामुळे या ठिकाणी भाविकांची आलोट गर्दी पहायला मिळते. यंदाच्या श्रावण मासातही ऋषीमुनींच्या या तपोभूमीत शिवभक्तांचा मेळा पहावयास मिळणार आहे.