उठाबा जिल्हाप्रमुख व राकाँ शहराध्यक्षांमध्ये 'फ्रीस्टाईल'

freestyle brawl : जिल्ह्यात नवरात्र उत्सव शांततेत साजरा होत असताना शहरातील मामा चौक परिसरातील दुर्गा उत्सव मंडपात प्रवेशावरून शिवसेना उठाबा जिल्हा प्रमुख व राष्ट्रवादी काँग्रेस (अजित पवार) शहर प्रमुख यांच्यात फ्रीस्टाईल हाणामारी झाल्याची घटना २९ सप्टेंबर रोजी रात्री ११.३० वाजताच्या सुमारास घडली. याप्रकरणी शहर पोलिसांनी उठाबाच्या जिल्हाप्रमुखासह सहा व इतर ३ ते ४ जणांवर गुन्हा दाखल केला आहे.

 

 

 

 

 

सार्वजनिक दुर्गा समितीचे अध्यक्ष तथा राष्ट्रवादी काँग्रेस (अजित पवार) गटाचे शहर अध्यक्ष नरेंद्रनाथ (नानू) नटराज मुदलीयार यांनी शहर पोलिसात दिलेल्या तक्रारीनुसार, शिवसेना (उठाबा) जिल्हाप्रमुख तथा माजी नगरसेवक पंकज यादव हे २९ सप्टेंबर रोजी त्यांच्या पत्नी माजी नगरसेविका ललिता यादव व इतर सहा जणासह सिव्हिल लाईन परिसरातील मामा चौक येथील सार्वजनिक दुर्गा उत्सव मंडळाच्या मंडपात दर्शनासाठी गेले. यावेळी मंडपात प्रवेश करतेवेळी मंडपात हवनकुंड निर्माणचे कार्य सुरू असल्याने मंडळाच्या सदस्याने त्यांना दुरूनच दर्शन घेण्याचे सांगून अडविले. यावर यादव व त्यांच्या समर्थकांनी शिवीगाळ करून मंडपात प्रवेशापासून अडविणार्‍याच्या श्रीमुखात हाणली.

 

 

यावेळी समितीचे अध्यक्ष मुदलीयार यांनी मध्यस्थी करत त्यांना मंडपात हवनकुंड निर्माण कार्य सुरू असल्याने कुणालाही मंडपाच्या आत प्रवेश करण्यापासून तूर्त मनाई करण्यात आली असल्याचे सांगितले. तेव्हा यादव यांनी त्यांच्याशी वाद घालून मुदलीयार यांच्या डाव्या डोळ्याजवळ विटाने मारहाण करून जखमी केले. तर त्यांच्या समर्थकांनी खुर्ची उचलून त्यांच्या अंगावर भिरकावत हवनकुंडासाठी असलेली वीट उचलून मारण्याचा प्रयत्न केला. दरम्यान, दुर्गा उत्सव समितीच्या अन्य सदस्यांनी धाव घेत प्रकरण शांत केले. परंतु हा सर्व प्रकार मंडपातील सीसीटीव्ही कॅमेरात कैद झाला असून मुदलीयार यांच्या तक्रारीवरून शहर पोलिसांनी पंकज यादव व त्यांची पत्नी यांच्यासह आरोपी बबल्या बोरकर (३५), यादव यांचा ड्रायव्हर आशिफ (२५) सर्व राहणार यादव चौक, ऐजाज पठाण (३५), जीत समुद्रे (१८) दोघेही राहणार गोविंदपूर व इतर तीन ते चार आरोपींच्या विरोधात गुन्हा दाखल केला आहे. जिल्ह्यात नवरात्र उत्सव भक्तीपूर्ण वातावरणात साजरा होत असताना मामा चौकातील घटेची माहिती शहरात वार्‍यासारखी पसरल्याने या घटनेची सर्वत्र चर्चा आहे.

 

 

 

मुदलीयार यांच्या तक्रारीवरून शहर पोलिसांनी गुन्हा नोंद करून पंकज यादव व त्यांच्या पत्नीसह इतर दोन आरोपींना ताब्यात घेतले असून दोघे फरार झाल्याचे पोलिसांकडून सांगण्यात आले आहे.