मकर संक्रांतीपूर्वी मिळणाऱ्या लाडकी बहीण हप्त्याचा वाद निवडणूक आयोगाकडे!

Congress writes a letter to the Election Commission. मकर संक्रांतीच्या पार्श्वभूमीवर महाराष्ट्र सरकारकडून लाडकी बहीण योजनेअंतर्गत महिलांच्या खात्यात ₹३,००० जमा करण्याचा निर्णय घेण्यात आला असून, यावरून राज्याच्या राजकारणात वाद निर्माण झाला आहे. डिसेंबर आणि जानेवारी महिन्याचे हप्ते एकत्र करून ही रक्कम लाभार्थी महिलांना देण्यात येणार आहे. मात्र, निवडणुकीच्या तोंडावर हा निर्णय घेतल्याने काँग्रेस पक्षाने आक्षेप नोंदवत थेट निवडणूक आयोगाकडे तक्रार दाखल केली आहे.

 

 

 

मुंबईतून मिळालेल्या माहितीनुसार, काँग्रेसने निवडणूक आयोगाला लिहिलेल्या पत्रात नमूद केले आहे की १५ जानेवारी रोजी मतदान होणार असताना त्याआधी महिलांच्या खात्यात थेट पैसे जमा करणे हे आदर्श आचारसंहितेचे उल्लंघन ठरू शकते. या योजनेचा लाभ सुमारे एक कोटी महिलांना मिळणार असून, त्यामुळे सत्ताधारी पक्षाच्या उमेदवारांच्या बाजूने मतदान होण्याची शक्यता वाढू शकते. काँग्रेसच्या मते, ही कृती अप्रत्यक्षरीत्या सरकारी लाचखोरीच्या स्वरूपात मोडते.

 

काँग्रेसने आपल्या भूमिकेत स्पष्ट केले आहे की ते लाडकी बहीण योजनेला विरोध करत नाहीत, मात्र निवडणूक प्रक्रिया पूर्ण झाल्यानंतरच लाभार्थी महिलांच्या खात्यात हप्ते जमा करावेत, अशी त्यांची मागणी आहे. या तक्रारीची दखल घेत निवडणूक आयोगाने महाराष्ट्राच्या मुख्य सचिवांना आज सकाळी ११ वाजेपर्यंत सरकारची भूमिका स्पष्ट करण्याचे निर्देश दिले आहेत.

 

दरम्यान, भारतीय जनता पक्षाने काँग्रेसच्या या भूमिकेवर तीव्र प्रतिक्रिया देत काँग्रेस पक्ष महिलाविरोधी असल्याचा आरोप केला आहे. भाजपच्या मते, महिलांच्या हितासाठी राबवली जाणारी योजना रोखण्याचा प्रयत्न काँग्रेस करत आहे, असा प्रतिहल्ला सत्ताधारी पक्षाकडून करण्यात आला आहे. मकर संक्रांतीचा सण १४ जानेवारी रोजी असून, त्यानंतर लगेचच १५ जानेवारीला मुंबई महानगरपालिकेच्या निवडणुका होणार आहेत. या निवडणुकांचे निकाल १६ जानेवारी रोजी जाहीर होणार आहेत. त्यामुळे निवडणुकीच्या अगदी आधी लाडकी बहीण योजनेचा लाभ दिल्यास महिलांची मते भाजपच्या बाजूने झुकू शकतात, अशी भीती काँग्रेसला वाटत आहे.