संविधान विटंबना प्रकरणातील आरोपी दत्ता पवारची आत्महत्या

Datta Pawar's suicide परभणी जिल्ह्यातून धक्कादायक बातमी समोर आली असून, संविधान विटंबना प्रकरणातील आरोपी दत्ता सोपान पवार यांनी आत्महत्या केल्याचे समोर आले आहे. जामिनावर सुटून अवघे काही दिवसच झाले असताना त्यांनी टोकाचे पाऊल उचलल्याने संपूर्ण परिसरात खळबळ उडाली आहे. परभणी शहरातील डॉ. बाबासाहेब आंबेडकर यांच्या पुतळ्यासमोरील संविधान शिल्पाची तोडफोड केल्याप्रकरणी अटकेत असलेले दत्ता सोपान पवार हे जवळपास १३ महिन्यांनंतर नुकतेच जामिनावर मुक्त झाले होते. जामीन मिळाल्यानंतर ते त्यांच्या मिर्झापूर गावात परतले होते. मात्र आज सकाळी त्यांनी मिर्झापूर येथील त्यांच्या शेतातील एका खोलीत गळफास घेऊन आत्महत्या केल्याचे उघड झाले.

 

 

दत्ता पवार यांना जामिनासाठी कुणीही पुढे न आल्याने मोफत विधी सल्ला संस्थेमार्फत वैयक्तिक बाँडवर त्यांची जामिनावर सुटका करण्यात आली होती. कारागृहात असताना ते मानसिक तणावात असल्याची माहिती असून त्यांच्यावर मानसोपचार तज्ज्ञांकडून उपचारही सुरू होते. कुटुंबापासून दुरावलेपण आणि सामाजिक दबावामुळे ते नैराश्यात होते, अशी प्राथमिक माहिती समोर येत आहे. याच मानसिक विवंचनेतून त्यांनी आत्महत्या केल्याचा अंदाज पोलिसांकडून व्यक्त केला जात आहे.

 

 

१० डिसेंबर २०२४ रोजी परभणीतील डॉ. बाबासाहेब आंबेडकर यांच्या पुतळ्यासमोरील संविधान शिल्पाची विटंबना झाल्याची घटना घडली होती. या घटनेनंतर शहरात मोठ्या प्रमाणावर आंदोलन आणि तीव्र प्रतिक्रिया उमटल्या होत्या. या प्रकरणाची दखल थेट देशपातळीवर घेण्यात आली होती. याच प्रकरणात आरोपी म्हणून दत्ता सोपान पवार यांना अटक करण्यात आली होती आणि ते तब्बल १३ महिने तुरुंगात होते. जामिनावर सुटल्यानंतर दत्ता पवार मिर्झापूर येथेच राहत होते. त्यांची पत्नी आणि दोन मुले पुणे येथे वास्तव्यास असून, इतर नातेवाईक परभणी जिल्ह्यातील विविध गावांत राहतात. काही दिवस गावात घालवल्यानंतर आज त्यांनी जीवन संपवल्याने परिसरात शोककळा पसरली आहे. घटनेची माहिती मिळताच पोलीस घटनास्थळी दाखल झाले असून पुढील तपास सुरू आहे.