चंद्रावर मुक्कामाचे स्वप्न लवकरच साकारणार!

hotel will be built on moon अंतराळ पर्यटनाची संकल्पना आता केवळ विज्ञानकथांपुरती मर्यादित राहिलेली नाही. खासगी अंतराळ कंपन्यांची वाढती स्पर्धा, नव्या तंत्रज्ञानामुळे कमी होत चाललेले प्रक्षेपण खर्च आणि अतिश्रीमंतांचा वेगळ्या अनुभवांकडे झुकणारा कल यामुळे अवकाश पर्यटन वेगाने वास्तवाच्या दिशेने सरकत आहे. याच पार्श्वभूमीवर चंद्रावर हॉटेल उभारण्याचा दावा करणाऱ्या एका अमेरिकन स्टार्टअपने जागतिक पातळीवर लक्ष वेधून घेतले आहे. कॅलिफोर्नियामधील GRU स्पेस नावाची कंपनी जगातील पहिले चंद्र हॉटेल उभारण्याच्या दिशेने काम करत असल्याचा दावा करत आहे. कंपनीच्या म्हणण्यानुसार, हे हॉटेल २०३२ पर्यंत पाहुण्यांसाठी खुले होऊ शकते. या प्रकल्पाला एनव्हीडिया इन्सेप्शन प्रोग्रामकडून पाठिंबा मिळाल्याने GRU स्पेसच्या तांत्रिक क्षमतेवर गुंतवणूकदारांचा विश्वास अधिक दृढ झाला आहे. यामुळेच या स्टार्टअपची चर्चा केवळ अंतराळ क्षेत्रातच नव्हे, तर जागतिक लक्झरी पर्यटन उद्योगातही रंगू लागली आहे.

 

 

 

GRU स्पेसने चंद्रावरील हॉटेलसाठी प्री-बुकिंग सुरू केल्याचे जाहीर केले आहे. यासाठी तब्बल दहा लाख डॉलर्सची आगाऊ ठेव मागितली जात असून, भारतीय चलनात ही रक्कम नऊ कोटी रुपयांहून अधिक होते. काही मर्यादित पॅकेजेससाठी २ लाख ५० हजार डॉलर्सचा पर्यायही उपलब्ध करून देण्यात आल्याचे सांगण्यात येत आहे. अतिश्रीमंत ग्राहकांना अत्यंत वेगळा आणि अनोखा चंद्रावरील मुक्कामाचा अनुभव देणे, हेच कंपनीचे मुख्य उद्दिष्ट आहे. या स्टार्टअपचे संस्थापक स्कायलर चॅन हे तरुण अभियंता असून त्यांनी इलेक्ट्रिकल इंजिनिअरिंग आणि संगणक विज्ञानाचे शिक्षण घेतले आहे. मानवजातीला भविष्यात बहु-ग्रहांवर वास्तव्यास जाणे अपरिहार्य ठरेल, असा त्यांचा विश्वास आहे. चंद्रावरील हॉटेल ही केवळ पर्यटन संकल्पना नसून, मानवाच्या अंतराळातील कायमस्वरूपी उपस्थितीकडे टाकलेले पाऊल असल्याचे ते सांगतात.

 

 

GRU स्पेस चंद्राच्या मातीचा वापर करून विटा तयार करण्याच्या तंत्रज्ञानावर काम करत आहे. या प्रक्रियेला ‘इन-सिटू रिसोर्स युटिलायझेशन’ असे म्हटले जाते. सुरुवातीच्या टप्प्यात फुगवता येणारी हॉटेल मॉड्यूल्स चंद्रावर पाठवली जाणार असून, पुढील टप्प्यात चंद्रावरच तयार केलेल्या विटांपासून मजबूत आणि कायमस्वरूपी संरचना उभारण्याची योजना आहे. कंपनी २०२९ मध्ये पहिली चाचणी मोहीम राबवण्याच्या तयारीत असून, या मोहिमेद्वारे निवास मॉड्यूल्स आणि बांधकाम प्रक्रियेची प्रत्यक्ष चाचणी घेतली जाणार आहे. एनव्हीडिया इन्सेप्शन प्रोग्राममधील सहभागामुळे GRU स्पेसला एआय, ऑटोमेशन आणि डिझाइन सिम्युलेशनसारख्या प्रगत तंत्रज्ञानाचा लाभ मिळणार आहे. याशिवाय, स्पेसएक्स आणि अँडुरिलशी संबंधित गुंतवणूकदारांचा पाठिंबा तसेच वाय कॉम्बिनेटरच्या हिवाळी बॅचमधील सहभागामुळे कंपनीला भक्कम आर्थिक आणि तांत्रिक नेटवर्क उपलब्ध झाले आहे. मात्र, चंद्रावर हॉटेल उभारणे ही सोपी बाब नाही. किरणोत्सर्गाचा धोका, प्रचंड तापमान बदल, नियामक परवानग्या आणि प्रक्षेपणाचा प्रचंड खर्च ही मोठी आव्हाने आहेत. या अडचणींवर मात करण्यासाठी चंद्रावरील खड्ड्यांचा नैसर्गिक संरक्षण म्हणून वापर करण्याची योजना असल्याचा दावा कंपनीने केला आहे.

 

अंतराळ पर्यटनाचा हा नवा प्रयोग भारतासह जागतिक बाजारपेठेत चर्चेचा विषय ठरत आहे. आशिया आणि भारतातील अतिश्रीमंत वर्गात नावीन्यपूर्ण आणि खास प्रवास अनुभवांविषयी वाढती उत्सुकता दिसून येत आहे. चंद्रावरील हॉटेलसारखे प्रकल्प भविष्यात लक्झरी पर्यटनाची संकल्पनाच बदलू शकतात, आणि एनव्हीडियासारख्या तंत्रज्ञान क्षेत्रातील दिग्गजांच्या पाठिंब्यामुळे GRU स्पेस हे नाव भविष्यातील अवकाश पर्यटनातील आघाडीचे ब्रँड ठरण्याची शक्यता वर्तवली जात आहे.