नाव इथे, मत तिथे! कसबा पेठेत मतदारांचा संताप

PMC Election 2026 : निवडणुकीसाठी पुणे आणि पिंपरी-चिंचवड शहरात मतदानाचा उत्साह हळूहळू वाढताना दिसून आला. सकाळच्या वेळेत मतदानाचा वेग काहीसा मंद असला तरी दुपारनंतर मतदार केंद्रांवर रांगा लागल्याचे चित्र पाहायला मिळाले. पहिल्या टप्प्यात सकाळच्या पहिल्या दोन तासांत पुण्यात सरासरी ५.५ टक्के, तर पिंपरी-चिंचवडमध्ये ७ टक्के मतदानाची नोंद झाली.

 

 

 

 

 

दुसऱ्या टप्प्यात सकाळी ११.३० वाजेपर्यंत पुण्यात मतदानाची टक्केवारी १२ टक्क्यांवर पोहोचली, तर पिंपरी-चिंचवडमध्ये १६.०३ टक्के मतदान झाले. दुपारी १.३० वाजेपर्यंतच्या तिसऱ्या टप्प्यात पुण्यात २६.२८ टक्के, तर पिंपरी-चिंचवडमध्ये २८.१५ टक्के मतदानाची नोंद झाली. दिवसाच्या शेवटच्या टप्प्यात पुण्यात एकूण मतदानाची टक्केवारी ३९ टक्क्यांवर, तर पिंपरी-चिंचवडमध्ये ४०.५० टक्क्यांपर्यंत पोहोचली आहे.

 

मतदान प्रक्रियेत तरुणांपासून ज्येष्ठ नागरिकांपर्यंत सर्वच घटकांचा सहभाग दिसून आला. अनेक ज्येष्ठ नागरिक रिक्षा आणि खासगी वाहनांच्या सहाय्याने मतदान केंद्रांवर पोहोचत होते. मात्र काही ठिकाणी मतदार यादीतील बदल आणि मतदान केंद्र बदलण्यात आल्यामुळे नागरिकांचा गोंधळ उडाल्याचे चित्र दिसले.

 

कसबा पेठेतील मतदार प्रविणी नाईक यांनी सांगितले की, मतदान केंद्र दुसऱ्या परिसरात हलवण्यात आल्याने मोठा गोंधळ झाला. नाव कसबा पेठेत असतानाही मतदान दुसरीकडे असल्यामुळे जवळपास अर्धा दिवस शोधण्यात गेला. गेली १८ वर्षे मतदान करत असताना असा अनुभव पहिल्यांदाच आल्याचे त्यांनी नमूद केले.

 

त्याचप्रमाणे प्रियंका गायकवाड यांनीही प्रशासनाच्या नियोजनावर नाराजी व्यक्त केली. यंदा अचानक मतदान केंद्र बदलल्यामुळे मोठा मनस्ताप सहन करावा लागला. अनेक वर्षे एकाच ठिकाणी मतदान केल्यानंतर असा बदल अनपेक्षित होता. घरातील काहींचे मतदान एका केंद्रावर तर काहींचे दुसऱ्या केंद्रावर असल्याने नाहक वेळ वाया गेल्याचे त्यांनी सांगितले.

 

एकूणच दुपारनंतर मतदानाचा वेग वाढला असला तरी मतदान केंद्र बदल आणि मतदार यादीतील गोंधळामुळे अनेक मतदारांना अडचणींचा सामना करावा लागला. प्रशासनाने भविष्यात वेळेवर आणि स्पष्ट माहिती देण्याची गरज असल्याचे मत नागरिकांकडून व्यक्त होत आहे.