एसआयआरविरोधात पश्चिम बंगाल पेटला

West Bengal protest against SIR पश्चिम बंगालमध्ये मतदार यादीच्या विशेष सघन पुनरावृत्ती (एसआयआर) प्रक्रियेविरोधात सुरू असलेल्या निदर्शनांना आता हिंसक वळण लागले आहे. गुरुवारी उत्तर दिनाजपूर जिल्ह्यातील चाकुलिया येथे संतप्त जमावाने बीडीओ कार्यालयावर हल्ला चढवत मोठ्या प्रमाणात तोडफोड केली आणि त्यानंतर कार्यालयाला आग लावली. या घटनेत सुमारे २० लाख रुपयांच्या सरकारी मालमत्तेचे नुकसान झाले आहे. परिस्थिती नियंत्रणात आणण्यासाठी पोहोचलेल्या पोलिसांवर जमावाने दगडफेक केली असून, या हल्ल्यात चाकुलिया पोलिस ठाण्याचे स्टेशन इन्चार्ज जखमी झाले. वाढत्या तणावाच्या पार्श्वभूमीवर परिसरात मोठ्या प्रमाणात पोलिस आणि सुरक्षा दल तैनात करण्यात आले आहे.

 

 

 

या प्रकरणी पोलिसांनी तातडीने कारवाई करत चाकुलिया पोलिस ठाण्यात एफआयआर नोंदवली असून आतापर्यंत दहा जणांना ताब्यात घेण्यात आले आहे. पश्चिम बंगालचे मुख्य निवडणूक अधिकारी यांनी सोशल मीडियावर दिलेल्या माहितीनुसार, गोलपोखर-२ चे बीडीओ सुजय धर आणि संबंधित अधिकाऱ्यांनी लेखी तक्रार दाखल केली आहे. या तक्रारीत बदमाशांच्या जमावाने बीडीओ कार्यालयाची तोडफोड करून सरकारी मालमत्तेचे मोठे नुकसान केले असून, काही सरकारी कर्मचारीही जखमी झाल्याचा उल्लेख आहे. राज्य सरकारचे मुख्य सचिव आणि पश्चिम बंगालचे पोलीस महासंचालक यांनी एसआयआर प्रक्रियेच्या सुनावणी स्थळांवर कडक सुरक्षा पुरवण्याचे आश्वासन दिले आहे.

 

निदर्शकांचा आरोप आहे की मतदार यादीच्या विशेष सघन पुनरावृत्तीअंतर्गत पडताळणीसाठी त्यांना वारंवार नोटिसा बजावल्या जात असून, सतत सुनावणीसाठी बोलावून त्यांचा त्रास केला जात आहे. या संतापातूनच बीडीओ कार्यालयावर हल्ला झाल्याचे सांगितले जात आहे. जमावाने कार्यालयातील संगणकांची तोडफोड केली, फायली जाळल्या, सरकारी कागदपत्रे फाडली तसेच फर्निचर, दरवाजे आणि खिडक्यांचे मोठ्या प्रमाणात नुकसान केले. इतकेच नव्हे तर कार्यालयातील उपकरणे बाहेर काढून पेटवण्यात आली. आगीवर नियंत्रण मिळवण्यासाठी येणाऱ्या अग्निशमन दलाच्या वाहनांना रोखण्यासाठी रस्ते अडवण्यात आले आणि टायर जाळण्यात आल्याचेही समोर आले आहे.

चाकुलियातील या हिंसाचारानंतर राज्यातील राजकीय वातावरण तापले आहे. भाजपचे प्रदेशाध्यक्ष सुकांत मजुमदार यांनी गंभीर आरोप करत म्हटले आहे की, ज्या भागांमध्ये एसआयआरविरोधात निदर्शने होत आहेत ते बहुसंख्य मुस्लिम वस्तीचे आहेत आणि तृणमूल काँग्रेसचे आमदार लोकांना जाणीवपूर्वक भडकवत आहेत. लोकसंख्येच्या समीकरणात बदल घडवण्याच्या उद्देशाने एसआयआर प्रक्रियेचे कामकाज अडवण्याचा प्रयत्न सुरू असल्याचा आरोप त्यांनी केला आहे. दरम्यान, प्रशासनाने परिस्थितीवर नियंत्रण ठेवण्यासाठी कडक पावले उचलली असून, कायदा आणि सुव्यवस्था राखण्यासाठी अतिरिक्त सुरक्षा व्यवस्था लागू करण्यात आली आहे.