अमृत भारत एक्सप्रेसमध्ये मोठा बदल...मुलांसह ज्येष्ठांना मिळणार खालचा बर्थ

Changes in Amrit Bharat Express अमृत भारत एक्सप्रेसमध्ये प्रवाशांसाठी मोठा बदल करण्यात आला आहे. आता या ट्रेनमध्ये आरएसीची तरतूद पूर्णपणे काढून टाकण्यात आली असून, प्रवाशांना अर्ध्या सीटवर बसण्याची अट लागू होणार नाही. स्लीपर क्लासमध्ये प्रवाशांना पूर्ण सीट मिळेल आणि मुलांसह प्रवास करणाऱ्या प्रवाशांना उपलब्धतेनुसार खालचा बर्थ मिळेल. विशेषतः ६० वर्षांवरील पुरुष आणि ४५ वर्षांवरील महिला प्रवाशांना आपोआप खालचा बर्थ दिला जाईल, अगदी मुलांसाठी बर्थ बुक केले नसले तरीही ही सुविधा लागू राहणार आहे, अशी माहिती रेल्वे बोर्डाचे प्रवासी विपणन समन्वय संचालक प्रवीण कुमार यांनी दिली आहे.

 

 

 

स्लीपर क्लासमध्ये प्रवासासाठी किमान २०० किलोमीटर भाडे लागू होईल, तर सामान्य क्लासमध्ये ५० किलोमीटरसाठी भाडे आकारले जाईल. त्यासोबत आरक्षण शुल्क आणि सुपरफास्ट भाडे वेगळे भरावे लागेल. प्रत्येक प्रवाशाकडून राउंडिंग-ऑफ पद्धतीने भाडे घेतले जाईल; उदाहरणार्थ, ₹२९६ भाडे असल्यास ₹३०० भरावे लागेल. अमृत भारत एक्सप्रेसमध्ये महिला कोटा, अपंग कोटा आणि ज्येष्ठ नागरिक कोटा उपलब्ध राहणार आहे, तर इतर कोणतेही आरक्षण कोटा लागू होणार नाहीत. विद्यमान तरतुदीनुसार अनारक्षित श्रेणीत प्रवासासाठी कोटा उपलब्ध राहील. सवलतीच्या तिकिटांसाठी किंवा परतफेड न केलेल्या मोफत पाससाठी ही सुविधा लागू राहणार नाही, मात्र ड्युटी पास मेल आणि एक्सप्रेस गाड्यांसारखा वैध राहील.

 

तिकिट रद्दीसाठी डिजिटल पेमेंटला प्राधान्य दिले जाईल. आरक्षित तिकीट रद्द केल्यावर २४ तासांच्या आत फक्त डिजिटल पेमेंटद्वारे परतफेड प्रक्रिया सुरु केली जाईल. काउंटरवरून तिकिट बुक केले असले तरी डिजिटल पेमेंटला प्राधान्य दिले जाईल, आणि प्रवासी डिजिटल पेमेंट करू शकत नसल्यास रद्द केलेले तिकिट सध्याच्या नियमांनुसार रोख रकमेत परत केले जाईल.