काबूलमधील रेस्टॉरंटमध्ये भीषण स्फोटात सात ठार

Explosion in Kabul अफगाणिस्तानची राजधानी काबूल येथे सोमवारी एक भीषण स्फोट झाला असून या घटनेत किमान सात जणांचा मृत्यू झाला आहे, तर अनेक जण जखमी झाले आहेत. काबूलमध्ये शस्त्रक्रिया सुविधा चालवणाऱ्या एका इटालियन वैद्यकीय संस्थेने ही माहिती दिली आहे. स्फोटाचे नेमके कारण अद्याप स्पष्ट झालेले नसून तपास सुरू आहे. शहर-ए-नॉ परिसरातील एका रेस्टॉरंटमध्ये हा स्फोट झाल्याचे प्राथमिक वृत्त असून, स्फोटानंतर काही वेळातच पोलिस प्रवक्ते खालेद झद्रान यांनी संबंधित ठिकाण हे हॉटेल असल्याचे सांगितले. स्फोटाच्या तीव्रतेमुळे परिसरात मोठी घबराट पसरली होती.

 

 

इटलीस्थित आपत्कालीन सेवा पुरवणाऱ्या एका स्वयंसेवी संस्थेने दिलेल्या माहितीनुसार, स्फोटानंतर २० जखमींना काबूलमधील त्यांच्या शस्त्रक्रिया केंद्रात दाखल करण्यात आले, त्यापैकी सात जणांचा मृत्यू उपचारापूर्वीच झाला होता. मृतांचा आकडा अद्याप तात्पुरता असल्याचे संस्थेने स्पष्ट केले आहे. संस्थेचे अफगाणिस्तानमधील संचालक देजान पॅनिक यांनी सांगितले की जखमींमध्ये चार महिला आणि एका मुलाचा समावेश असून अनेकांना गंभीर जखमा व ओरखडे आहेत. काही रुग्णांवर शस्त्रक्रिया करण्याची आवश्यकता असल्याचेही त्यांनी नमूद केले.

दरम्यान, अफगाण गृह मंत्रालयाचे प्रवक्ते अब्दुल मतीन कानी यांनी स्फोटात अनेक लोकांचा मृत्यू झाल्याची आणि काही जण जखमी झाल्याची पुष्टी केली असून, घटनेमागील कारणांचा सखोल तपास सुरू असल्याचे सांगितले आहे. मात्र, अधिकृत मृतांची संख्या त्यांनी जाहीर केलेली नाही. चीनच्या सरकारी प्रसारक सीसीटीव्हीने दिलेल्या वृत्तानुसार, या स्फोटात दोन चिनी नागरिक गंभीर जखमी झाले असून एका सुरक्षा रक्षकाचा मृत्यू झाला आहे. स्थानिक माध्यमे आणि प्रसारित व्हिडिओंमध्ये स्फोटानंतरचा गोंधळ दिसून येत असून, रस्त्यांवर धूर आणि धुळीचे लोट पसरलेले पाहायला मिळाले.