२१ वर्षीय तरुणाचा राजगडावर हृदयविकाराने मृत्यू

Death due to heart attack at Rajgad राजगड किल्ल्यावर अवघड चढाई करताना २१ वर्षीय पर्यटकाचा हृदयविकाराच्या झटक्याने मृत्यू झाला, ज्यामुळे पुण्यात खळबळ उडाली आहे. मृतक नागराज कोरे हा पुण्यातील रहिवासी असून तो आपल्या पाच–सहा मित्रांसोबत राजगडावर ट्रेकसाठी आला होता. चोर दरवाजा मार्ग तात्पुरता बंद असल्यामुळे पर्यटकांना गुंजवणे दरवाजा मार्गानेच चढाई करावी लागत होती, आणि या मार्गाने जात असताना नागराज याचा जीव गेला. राजगडाच्या तटबंदीच्या दुरुस्तीमुळे सोपा चढाईचा चोर दरवाजा मार्ग बंद ठेवण्यात आला आहे. त्यामुळे नागराज आणि त्याचे मित्र गुंजवणे प्रवेशद्वाराच्या खालील बिकट टप्प्यातून किल्ल्यावर चढत होते. या चढाईत नागराज याला दम आला आणि त्याला चक्कर आली; तो खाली पडला.

 

 

 

 

मित्रांनी त्याला धीर देत उठवले, मात्र थोड्या वेळाने तो पुन्हा चढाई करताना दम लागून छातीत दुखू लागले. काही वेळातच तो खाली कोसळला. घटना कळताच राजगडावरील पुरातत्व विभागाचे सुरक्षा रक्षक विशाल पिलावरे, स्थानिक युवक गणेश ढेबे आणि काही पर्यटक घटनास्थळी धावले. त्यांनी नागराज कोरेचा मृतदेह गडावरून खाली आणून खासगी वाहनातून ग्रामीण रुग्णालयात नेला. स्थानिक पोलिसांनी घटनास्थळी पोहोचून तपास सुरु केला आहे. नागराज पुण्यात एका खासगी कंपनीत नोकरी करत होता आणि आज सुट्टी असल्यामुळे मित्रांसोबत किल्ल्यावर ट्रेकसाठी आला होता. गुंजवणे दरवाजा मार्ग अत्यंत बिकट असल्यामुळे त्याला धाप लागली आणि चढत–चढत त्याचा मृत्यू झाला.