...तर चीनचे १ लाख सैनिक मारले जातील!

Then Chinese soldiers will be killed तैवानविरोधात युद्ध छेडल्यास चीनला अतिशय मोठी किंमत मोजावी लागू शकते, असा धक्कादायक दावा एका नव्या आंतरराष्ट्रीय अहवालात करण्यात आला आहे. एका अमेरिकन थिंक टँकने प्रसिद्ध केलेल्या या अहवालानुसार, जर चीनने तैवानवर नौदलाच्या माध्यमातून थेट आक्रमण केले, तर तब्बल एक लाख चिनी सैनिक मारले जाण्याची शक्यता आहे. इतकेच नव्हे, तर या युद्धाचा शेवट चीनला माघार घ्यावी लागण्यात होऊ शकतो, असा निष्कर्षही अहवालात काढण्यात आला आहे. चीन गेल्या काही काळापासून तैवानवर राजकीय आणि लष्करी दबाव वाढवत आहे. सातत्याने धमक्या, लष्करी सराव आणि सामुद्रधुनीतील हालचालींमुळे आशिया-पॅसिफिक भागात तणावाचे वातावरण निर्माण झाले आहे. अशाच पार्श्वभूमीवर जर्मन मार्शल फंडने तयार केलेला आणि ‘फोकस तैवान’मध्ये प्रकाशित झालेला हा अहवाल समोर आला आहे. या थिंक टँकला अमेरिकन सरकारकडूनही निधी मिळतो.

 

 

 

 

‘जर चीनने तैवानवर हल्ला केला तर’ या शीर्षकाच्या या अभ्यासात विविध संभाव्य परिस्थितींचे विश्लेषण करण्यात आले आहे. पूर्ण प्रमाणातील मोठ्या युद्धापासून ते मर्यादित संघर्षापर्यंतच्या पर्यायांमध्ये चीनला होणारे लष्करी, सामरिक आणि आंतरराष्ट्रीय नुकसान तपासण्यात आले आहे. अहवालाचे सहलेखक आणि अमेरिकन एंटरप्राइज इन्स्टिट्यूटचे वरिष्ठ फेलो जॅक कूपर यांच्या मते, चिनी सैन्याने समुद्रमार्गे आक्रमण केल्यास ते केवळ तैवानपुरते मर्यादित न राहता संपूर्ण क्षेत्रीय युद्धात परिवर्तित होईल. या संघर्षात तैवानच्या सैन्यासोबतच जपान आणि गुआममधील अमेरिकन लष्करी तळही लक्ष्य बनू शकतात. अहवालानुसार, चिनी सैन्य तैवानच्या किनाऱ्यांपर्यंत पोहोचू शकते, मात्र त्यांचे पुरवठा मार्ग गंभीरपणे विस्कळीत होतील. कारण तैवान आणि अमेरिका एकत्रितपणे सामुद्रधुनी ओलांडणाऱ्या चिनी जहाजांवर आणि लढाऊ विमानांवर हल्ले करू शकतील. परिणामी ही लढाई अनेक महिने चालण्याची शक्यता असून चीनला प्रचंड जीवितहानी सहन करावी लागेल. या संघर्षात सुमारे एक लाख चिनी सैनिक मारले जाऊ शकतात, असा अंदाज व्यक्त करण्यात आला आहे.

 

या परिस्थितीत अखेरीस बीजिंगला पराभव स्वीकारावा लागू शकतो, मात्र अट अशी असेल की चिनी सैन्याला सुरक्षितपणे मुख्य भूमीवर परतण्याची परवानगी दिली जाईल. तरीही चीन पूर्णपणे रिकाम्या हाताने परतणार नाही, असेही अहवालात नमूद करण्यात आले आहे. तैवानच्या मुख्य बेटावरून माघार घेतली तरी किनमेन आणि मात्सु ही रणनीतिकदृष्ट्या महत्त्वाची बेटे चीनच्या ताब्यात राहू शकतात. म्हणजेच युद्ध हरल्यानंतरही तैवानला काही भूभाग गमवावा लागू शकतो. या युद्धाचे परिणाम केवळ चीन आणि तैवानपुरते मर्यादित राहणार नाहीत. अहवालानुसार, अमेरिकेला सुमारे पाच हजार सैनिक आणि एक हजार नागरिकांचा बळी द्यावा लागू शकतो, तर जपानमध्ये अंदाजे एक हजार सैनिक आणि पाचशे नागरिक मृत्युमुखी पडू शकतात. तैवानलाही या संघर्षाची मोठी किंमत मोजावी लागेल. अंदाजानुसार, सुमारे पन्नास हजार तैवानी सैनिक आणि तितकेच नागरिक या युद्धात मारले जाऊ शकतात.

 

हा अहवाल अशा वेळी समोर आला आहे, जेव्हा काही दिवसांपूर्वीच चीनने तैवानभोवती मोठ्या प्रमाणावर लष्करी सराव केले होते. या सरावात नौदल आणि हवाई दलाच्या व्यापक हालचालींचा समावेश होता. अहवालात संभाव्य आंतरराष्ट्रीय प्रतिसादांचेही विश्लेषण करण्यात आले आहे. यासाठी १९८९ मधील तियानमेन चौकातील हत्याकांड, हाँगकाँगमधील विविध आंदोलनं आणि २०२२ मधील रशियाचे युक्रेनवर आक्रमण अशा घटनांचा अभ्यास करण्यात आला आहे. या अभ्यासानुसार, मोठ्या युद्धाच्या परिस्थितीत आंतरराष्ट्रीय समुदायाकडून होणाऱ्या अनेक उपाययोजनांपैकी केवळ काहीच चीनला खरोखर मोठे नुकसान पोहोचवू शकतात. त्यामध्ये चिनी नेतृत्वाच्या परदेशातील मालमत्ता गोठवण्यासारख्या कठोर कारवाईचा समावेश असल्याचेही या अहवालात नमूद करण्यात आले आहे. तैवानवर हल्ला केल्यास त्याची किंमत किती भयावह असू शकते, याचा इशारा देणारा हा अहवाल सध्या आंतरराष्ट्रीय राजकारणात मोठी चर्चा निर्माण करत आहे.