शाळा बंद असतानाही वाटले मध्यान्ह भोजन!...₹२,००० कोटींचा घोटाळा उघडकीस

Midday meal scam राजस्थानमधील मध्यान्ह भोजन योजनेत घोटाळा उघड झाला आहे. राज्य लाचलुचपत प्रतिबंधक विभागाने (एसीबी) ₹२,००० कोटींच्या भ्रष्टाचाराचा तपास पूर्ण करून २१ आरोपींविरुद्ध एफआयआर दाखल केली आहे. या प्रकरणात राजस्थान राज्य सहकारी ग्राहक महासंघ लिमिटेड (CONFED), केंद्रीय भंडार आणि अनेक खाजगी कंपन्यांचा समावेश आहे. साथीच्या काळात, कोविड-१९ मुळे शाळा बंद असतानाही मुलांना अन्न पुरवठा केला जात होता. CONFED मार्फत शालेय विद्यार्थ्यांना डाळी, तेल, मसाले आणि इतर अन्नपदार्थांचे कॉम्बो पॅक वितरण करण्यात आले. तथापि, चौकशीदरम्यान असे समोर आले की, अनेक ठिकाणी कोणत्याही खरेदी किंवा पुरवठ्याशिवाय बनावट आणि फुगवलेली बिले तयार करून पेमेंट जारी करण्यात आले होते. या फसवणुकीमुळे राज्याला एकूण ₹२,००० कोटींचे नुकसान झाले.

 

 

 

सूत्रांनुसार, अशोक गेहलोत सरकारमधील माजी मंत्री आणि सध्या भाजप नेते राजेंद्र यादव यांचे पुत्र मधुर यादव आणि त्रिभुवन यादव या प्रकरणात आरोपी आहेत. तसेच, खाजगी फर्मसाठी विविध कामे हाताळणारे इतर नातेवाईकही एफआयआरमध्ये समाविष्ट आहेत. एसीबीच्या तपासात असे दिसून आले की बनावट बिलांचा वापर करून खोटे पैसे राज्याच्या निधीतून बाहेर काढले गेले. भ्रष्टाचाराच्या या प्रकरणामुळे मध्यान्ह भोजन योजनेतील वितरण व्यवस्थेवरही प्रश्नचिन्ह निर्माण झाले आहे. राजस्थान एसीबीने या प्रकरणाची संपूर्ण चौकशी करत असून, आरोपींविरुद्ध पुढील कारवाईसाठी आवश्यक ती प्रक्रिया सुरू केली आहे.