आमचा जाहीर पाठिंबा...मिका सिंगकडून ११ लाखांची मदत

Mika Singh विनोदी अभिनयासाठी ओळखले जाणारे अभिनेता राजपाल यादव सध्या गंभीर आर्थिक आणि कायदेशीर संकटाला सामोरे जात आहेत. चेक बाऊन्स प्रकरणात न्यायालयीन कारवाईनंतर त्यांनी तिहार कारागृहात आत्मसमर्पण केले असून, त्यांच्यावर सुमारे ९ कोटी रुपयांचे कर्ज असल्याची माहिती समोर आली आहे. या कठीण काळात बॉलिवूडमधील अनेक कलाकारांनी त्यांना मदतीचा हात पुढे केला असून, गायक मिका सिंगने ११ लाख रुपयांची आर्थिक मदत जाहीर केली आहे.

 

 

 

तिहार तुरुंगात जाण्यापूर्वी राजपाल यादव भावूक झाले होते. “मी काय करावे? माझ्याकडे पैसे नाहीत. मला दुसरा कोणताही मार्ग दिसत नाही. इथे सर्वजण एकटे आहेत, कोणतेही मित्र नाहीत. मला एकट्यानेच यातून बाहेर पडावे लागेल,” असे त्यांनी म्हटले होते. त्यांच्या या वक्तव्याने चित्रपटसृष्टीत सहानुभूतीची लाट उसळली. अभिनेता सोनू सूदसह अनेक कलाकारांनी त्यांना मदत करण्याची तयारी दर्शवली.

 

 

या पार्श्वभूमीवर Mika Singh मिका सिंगने पुढाकार घेत ११ लाख रुपयांची देणगी जाहीर केली. “राजपाल यादवजी, या कठीण काळात मी तुमच्यासोबत खंबीरपणे उभा आहे. तुम्ही लाखो लोकांच्या चेहऱ्यावर हास्य आणले आहे आणि आज तुमच्यासोबत उभे राहण्याची आमची वेळ आली आहे,” असे मिका सिंगने सांगितले. त्याने चित्रपटसृष्टीतील कलाकार, निर्माते आणि दिग्दर्शकांना त्यांच्या क्षमतेनुसार आर्थिक मदत करण्याचे आवाहन केले आहे.मिका सिंगने एका व्हिडिओ संदेशाद्वारेही उद्योगातील सहकाऱ्यांना आवाहन केले. “मी असे म्हणत नाही की कोणी ५ कोटी रुपये द्यावेत. पण जर २० जणांनीही ५० लाख, २५ लाख किंवा ११ लाख रुपये दिले, तर आपण राजपाल यादव यांना या संकटातून बाहेर काढू शकतो. फक्त पोस्ट करून सहानुभूती दाखवू नका, प्रत्यक्ष मदत करा,” असे तो म्हणाला. “आपण एक कुटुंब आहोत आणि आपल्या लोकांसाठी एकजूट राहिले पाहिजे,” असेही त्याने नमूद केले.दरम्यान, या प्रकरणाची पार्श्वभूमी २०१० सालातील आहे. राजपाल यादव यांनी त्यांच्या ‘आता पता लापता’ या चित्रपटासाठी मुरली प्रोजेक्ट्स प्रायव्हेट लिमिटेडकडून ५ कोटी रुपयांचे कर्ज घेतले होते. मात्र चित्रपट बॉक्स ऑफिसवर अपयशी ठरल्याने त्यांना मोठे आर्थिक नुकसान सहन करावे लागले. कर्जफेड न झाल्याने हे प्रकरण चेक बाऊन्सपर्यंत पोहोचले आणि न्यायालयीन कारवाईला सुरुवात झाली.

 

 

राजपाल यादव यांनी Mika Singh अनेक वर्षे आपल्या विनोदी भूमिकांमधून प्रेक्षकांचे मनोरंजन केले आहे. मात्र आज ते स्वतःच संकटात सापडले आहेत. त्यांच्या समर्थनार्थ बॉलिवूडमध्ये एकजूट दिसून येत असली, तरी पुढील न्यायालयीन प्रक्रिया आणि कर्जफेडीचा प्रश्न अद्याप कायम आहे. उद्योगातील सहकाऱ्यांचा पाठिंबा त्यांना या कठीण टप्प्यातून बाहेर पडण्यासाठी कितपत मदत करतो, याकडे सर्वांचे लक्ष लागले आहे.