'मुझे मार देंगे'....आणि 'तिचा' संशयास्पद मृत्यू

Suspicious death of a married woman बिहारमधील सुपौल जिल्ह्यातील राघोपूर पोलीस ठाण्याच्या हद्दीत येणाऱ्या राम विशनपूर वॉर्ड क्रमांक ७ मध्ये एका विवाहित महिलेचा संशयास्पद मृत्यू झाल्याने खळबळ उडाली आहे. “ते मला मारतील…,” असा आर्त फोन केल्यानंतर दुसऱ्याच दिवशी ३५ वर्षीय महिलेचा मृतदेह घरात आढळून आला. या घटनेने गावकऱ्यांना हादरवून सोडले असून, तिच्या तीन लहान मुलांवर दुःखाचा डोंगर कोसळला आहे. मृत महिलेची ओळख कौशल्या देवी अशी असून तिचा विवाह सुमारे दहा वर्षांपूर्वी देवीपूर कोरियापट्टी येथे सुंदर मुखिया यांच्याशी झाला होता. पती, सासू-सासरे आणि इतर कुटुंबीयांसह ती राम विशनपूर येथे राहत होती. घटनेच्या आदल्या रात्री तिने आपल्या भावाला फोन करून जीवाला धोका असल्याची भीती व्यक्त केली होती. सकाळी घरी येण्यास सांगितल्यानंतर काही तासांतच तिच्या मृत्यूची बातमी कुटुंबीयांना मिळाली.

 

 

 

नातेवाईक घटनास्थळी पोहोचले तेव्हा कौशल्या देवी घरात पडलेल्या अवस्थेत आढळली. तिच्या मानेवर जखमांचे ठसे दिसत होते. जवळच दोरी आणि पट्टा आढळल्याने मृत्यूभोवती संशयाची छाया अधिक गडद झाली आहे. कुटुंबीयांचा आरोप आहे की, तिचा गळा दाबून खून करण्यात आला. तसेच घटनेनंतर अगरबत्ती लावण्यात आल्याचा आणि सासरच्या मंडळींनी घर सोडून पलायन केल्याचा आरोपही करण्यात आला आहे. या प्रकरणाची माहिती मिळताच राघोपूर पोलीस घटनास्थळी दाखल झाले. ठाणे प्रमुख अमित कुमार राय यांनी पथकासह जागेची पाहणी करून पंचनामा केला. मृतदेह ताब्यात घेऊन शवविच्छेदनासाठी पाठवण्यात आला आहे. फरार झालेल्या संशयितांचा शोध घेण्यासाठी छापेमारी सुरू असल्याचे पोलिसांनी सांगितले.