न्यूझीलंडला धक्का; ३० व्या वर्षी क्रिकेटला खेळाडूची निवृत्ती

New Zealand shocked न्यूझीलंड महिला क्रिकेट संघातील अनुभवी फलंदाज लॉरेन डाउन हिने अवघ्या ३० व्या वर्षी आंतरराष्ट्रीय क्रिकेटमधून निवृत्ती जाहीर केली आहे. जवळपास दीड दशकांच्या कारकिर्दीनंतर तिने खेळाला अलविदा करण्याचा निर्णय घेतला. देशाचे प्रतिनिधित्व करण्याची संधी मिळणे हे आयुष्यातील मोठे भाग्य असल्याची भावना व्यक्त करत तिने सहकाऱ्यांसोबत घालवलेले क्षण कायम स्मरणात राहतील असे सांगितले.

 

 

ऑकलंडमध्ये जन्मलेल्या डाउनने २०११ साली स्थानिक संघाकडून टी-२० प्रकारात पदार्पण केले. त्यानंतर तिने एकूण २०२ सामने खेळत सातत्यपूर्ण कामगिरी केली. राज्य संघासाठी १०१ एकदिवसीय आणि १०१ टी-२० सामने खेळताना ती संघातील सर्वाधिक धावा करणाऱ्या खेळाडूंमध्ये अग्रस्थानी राहिली. टी-२० प्रकारात १४९६ तर एकदिवसीय सामन्यांत २६९० धावा तिच्या नावावर जमा झाल्या. कारकिर्दीच्या सुरुवातीला अष्टपैलू खेळाडू म्हणून तिने ४१ बळीही घेतले. हॅलीबर्टन जॉनस्टोन शिल्ड स्पर्धेत पाच वेळा विजेतेपद पटकावणाऱ्या संघात तिचा महत्त्वाचा वाटा होता. २०१९-२० च्या अंतिम सामन्यात नॉर्दर्न डिस्ट्रिक्ट्सविरुद्ध तिने केलेल्या ९० धावांच्या खेळीमुळे ऑकलंडला मोठा विजय मिळाला.

 

 

घरगुती स्पर्धांतील सातत्यपूर्ण कामगिरीमुळे २०१८ मध्ये तिची न्यूझीलंड महिला संघात निवड झाली. त्याच वर्षी वेस्ट इंडिजविरुद्ध तिने पहिला एकदिवसीय सामना खेळला. सुमारे सहा वर्षांच्या आंतरराष्ट्रीय कारकिर्दीत तिने ३५ एकदिवसीय आणि १३ टी-२० सामने खेळले. २०२१ मध्ये बे ओव्हल येथे ऑस्ट्रेलियाविरुद्ध केलेली ९० धावांची खेळी तिच्या उल्लेखनीय कामगिरींपैकी एक मानली जाते. २०२२ च्या महिला विश्वचषक स्पर्धेदरम्यान अंगठ्याच्या दुखापतीमुळे तिला माघार घ्यावी लागली होती. मात्र त्यानंतर तिने पुनरागमन करत २०२३ च्या महिला टी-२० विश्वचषक स्पर्धेत स्थान मिळवले. प्रसूती रजेनंतर मैदानात परत येत तिने जिद्दीचे उदाहरण घालून दिले.