रिक्षासोबत माणूसकी धावली...ऊसतोड महिलेची वाहतूक कोंडीतच प्रसूती

Nashik childbirth, नाशिक जिल्ह्यातील मनमाड शहरातून जाणाऱ्या इंदूर-पुणे राष्ट्रीय महामार्गावर आज माणुसकीचा जिवंत अनुभव देणारी घटना घडली. सोलापूर जिल्ह्यातून ऊसतोड करून मनमाड मार्गे नंदुरबार जिल्ह्यातील केळीपणी परतत असलेल्या गर्भवती महिलेने रस्त्यावर रिक्षामध्येच बाळाला जन्म दिला.

 

 

माहितीनुसार, रस्त्यावर वाहनांच्या लांबच लांब रांगा होत्या आणि रुग्णालय दूर असल्यामुळे कुटुंबीय चिंतेत होते. अशा असहाय परिस्थितीत रिक्षाचालक अमजद अत्तरने तत्काळ मदतीचा हात पुढे केला. सामाजिक कार्यकर्ते रितेश पगारे यांनी दुचाकीवरून रस्त्यातील वाहतूक मार्ग मोकळा करत रिक्षेला उपजिल्हा रुग्णालय, मनमाडकडे पुढे नेण्यास मदत केली.

मात्र नियतीने वेगळाच निर्णय घेतला. रस्त्याच्या मध्यभागी रिक्षामध्येच महिलेने एका गोंडस बाळाला जन्म दिला. नवजात बाळाचा पहिला रडण्याचा आवाज ऐकून उपस्थितांनी सुटकेचा निःश्वास टाकला. या क्षणी खऱ्या अर्थाने माणुसकीची छटा दिसून आली.सुदैवाने आई-बाळ दोघेही सुखरुप आहेत. दोघांवरही उपजिल्हा रुग्णालय, मनमाड येथे तातडीने उपचार करण्यात आले. या घटनेतून स्पष्ट झाले की, जरी वाहतूक कोंडी गंभीर असली तरी, मानवी मदत आणि तत्परतेमुळे प्राणवायू जीवनाला वाचवता येतो. आजच्या या प्रसंगातून माणुसकीचा सुवास रस्त्यावरूनही दरवळला आणि एका जीवाला सुरक्षित जन्म मिळाला.