५९० कोटींच्या गैरव्यवहार प्रकरणी चार अधिकारी निलंबित

590 crores fraud case हरियाणा सरकारच्या खात्यांशी संबंधित सुमारे ५९० कोटी रुपयांच्या कथित आर्थिक गैरव्यवहार प्रकरणात नवे वळण आले आहे. या प्रकरणी हरियाणा राज्य दक्षता व लाचलुचपत प्रतिबंधक विभागाने गुन्हा नोंदवला असून बँक अधिकारी, काही शासकीय कर्मचारी तसेच इतर संबंधित व्यक्तींविरुद्ध विविध कायद्यांअंतर्गत कारवाईची प्रक्रिया सुरू करण्यात आली आहे. आयडीएफसी फर्स्ट बँकने यापूर्वीच आपल्या काही कर्मचाऱ्यांविरोधात तक्रार दाखल केली होती. बँकेच्या माहितीनुसार, हरियाणा सरकारच्या एका विभागाने आपले खाते बंद करून ठेव दुसऱ्या बँकेत हलवण्याची विनंती केली असता नोंदींमध्ये मोठी तफावत आढळून आली.

 

 

विभागाच्या कागदोपत्री शिल्लक आणि बँकेच्या नोंदीतील रकमेतील फरक लक्षात आल्यानंतर अंतर्गत चौकशी सुरू करण्यात आली. या घडामोडींची माहिती बँकेने नियामक प्राधिकरणाला दिली असून भारतीय रिझर्व्ह बँकेलाही कळविण्यात आले आहे. पुढील तपासात हरियाणा सरकारच्या इतर संस्थांच्या खात्यांमध्येही नोंदी आणि प्रत्यक्ष शिल्लक यांच्यात फरक दिसून आल्याचे समोर आले. प्राथमिक तपासानुसार हे प्रकरण चंदीगड शाखेद्वारे हाताळल्या जाणाऱ्या काही विशिष्ट सरकारी खात्यांपुरते मर्यादित असल्याचे सांगितले जात आहे आणि इतर ग्राहकांवर त्याचा परिणाम झालेला नाही. तपास पूर्ण होईपर्यंत संशयित चार अधिकाऱ्यांना निलंबित करण्यात आले आहे. बँकेने स्पष्ट केले आहे की दोषी आढळणाऱ्यांविरुद्ध कठोर शिस्तभंगात्मक तसेच दिवाणी आणि फौजदारी कारवाई करण्यात येईल. दरम्यान, दक्षता विभागाकडून सखोल चौकशी सुरू असून या प्रकरणातील जबाबदारी निश्चित करण्याचे काम सुरू आहे.