स्वदेशी आयएनएस अंजदीप लवकरच नौदलात दाखल होणार!

Indigenous INS Anjdeep भारतीय नौदलाच्या सामर्थ्यात लवकरच आणखी भर पडणार आहे. शत्रूच्या पाणबुड्यांचा समुद्राच्या उथळ भागात शोध घेऊन त्यांचा नाश करण्याची क्षमता असलेली आयएनएस अंजदीप ही युद्धनौका नौदलाच्या ताफ्यात दाखल होण्याच्या मार्गावर आहे. विशेष म्हणजे ही नौका पूर्णपणे देशात तयार करण्यात आली असून ती ‘मेक इन इंडिया’ उपक्रमाचा महत्त्वाचा भाग आहे. या युद्धनौकेच्या बांधकामासाठी लागणारे विशेष दर्जाचे संपूर्ण स्टील देशातील सार्वजनिक क्षेत्रातील अग्रगण्य आणि महारत्न दर्जा प्राप्त स्टील अथॉरिटी ऑफ इंडिया लिमिटेड (सेल) यांनी पुरवले आहे. गार्डन रीच शिपबिल्डर्स अँड इंजिनिअर्स लिमिटेड (जीआरएसई) यांनी ही नौका उभारली असून तिच्यासाठी लागणारे सुमारे साडेतीन हजार टन विशेष दर्जाचे स्टील सेलच्या बोकारो, भिलाई आणि राउरकेला येथील एकात्मिक कारखान्यांतून उपलब्ध करून देण्यात आले आहे.

 

 

 

 

आयएनएस अंजदीप ही उथळ पाण्यात पाणबुडीविरोधी कारवाईसाठी तयार करण्यात आलेल्या तिसऱ्या प्रकारातील युद्धनौका आहे. यापूर्वी आयएनएस अर्नाला आणि आयएनएस अँड्रोथ या दोन नौका सेवेत दाखल करण्यात आल्या आहेत. जुन्या अभय वर्गातील जहाजांना पर्याय म्हणून या नव्या युद्धनौका स्वदेशी तंत्रज्ञानाच्या आधारे विकसित केल्या जात आहेत. या प्रकल्पामुळे संरक्षण क्षेत्रातील देशाची स्वावलंबनाची वाटचाल अधिक मजबूत होत आहे. आयातीत साहित्यावरील अवलंबित्व कमी करून देशांतर्गत उत्पादन साखळीला चालना देण्याच्या उद्देशाने हा उपक्रम राबवण्यात येत आहे. ‘आत्मनिर्भर भारत’ या संकल्पनेला बळ देत सेलने गेल्या काही वर्षांत संरक्षणासाठी आवश्यक असलेल्या विशेष दर्जाच्या स्टीलची गरज सातत्याने पूर्ण केली आहे. भारतीय नौदलाच्या आधुनिकीकरणाच्या प्रक्रियेत हा टप्पा महत्त्वाचा मानला जात आहे.