होळी आणि धुळवडीवर चंद्रग्रहणाचे सावट!

Holi, Dhulivandan महाराष्ट्रमध्ये यंदाच्या होळी आणि धुळवडीच्या सणादरम्यान चंद्रग्रहणाची खगोलशास्त्रीय घटना घडणार असल्याने धार्मिक वर्तुळात चर्चा रंगली आहे. यवतमाळसह राज्यातील विविध भागांत पंचांगकर्त्यांनी सणाचे विधी ग्रहणकाळ लक्षात घेऊन पार पाडावेत, असे आवाहन केले आहे.

 

 

फाल्गुन पौर्णिमेला होलिका दहनाचा पारंपरिक विधी पार पडणार असला तरी त्याच काळात चंद्रग्रहणाची छाया पडणार आहे. खगोलशास्त्रीय गणनेनुसार, ग्रहणाचा वेध दुपारनंतर सुरू होणार असून सायंकाळी चंद्र उगवताना तो ग्रहणग्रस्त अवस्थेत दिसण्याची शक्यता आहे. त्यामुळे वेधकाळात अन्नसेवन टाळणे, देवपूजा न करणे तसेच ग्रहण संपल्यानंतर स्नान करून शुद्धीकरण करणे, अशा धर्मशास्त्रातील सूचनांचे पालन करण्याचा सल्ला देण्यात आला आहे.धुळवडीच्या दिवशी सकाळच्या वेळेत रंगोत्सव साजरा करण्यात कोणतीही अडचण नसली तरी ग्रहणकाळात धार्मिक नियमांचे पालन करणे आवश्यक असल्याचे तज्ज्ञांनी स्पष्ट केले आहे. विशेषतः लहान मुले, वृद्ध आणि आजारी व्यक्तींनी वेधकाळाबाबत काळजी घ्यावी, असेही सांगण्यात आले आहे.दरम्यान, या संदर्भातील सविस्तर माहिती प्रसिद्ध झाल्यानंतर नागरिकांमध्ये उत्सुकता वाढली आहे. धार्मिक श्रद्धा आणि खगोलशास्त्रीय घटना यांचा अनोखा संगम यंदाच्या होळीला लाभणार असल्याने सण अधिक वैशिष्ट्यपूर्ण ठरणार आहे. पंचांगकर्त्यांनी नागरिकांना वेळेचे योग्य नियोजन करून उत्सव साजरा करण्याचे आवाहन केले आहे.