सवलतीच्या दरात घडणार तीर्थक्षेत्रांचे दर्शन

स्वर्गीय हिंदूहृदयसम्राट बाळासाहेब ठाकरे यांच्या जयंतीचे औचित्य साधून महाराष्ट्र राज्य मार्ग परिवहन महामंडळाने (एसटी) प्रवाशांसाठी ’हिंदूहृदयसम्राट बाळासाहेब एसटी संगे तीर्थाटन’ ही अभिनव योजना जाहीर केली आहे. सर्वसामान्य नागरिकांना परवडणार्‍या दरात सुरक्षित आणि सुलभ धार्मिक पर्यटन उपलब्ध करून देणे हा या योजनेचा मुख्य उद्देश आहे. नागपूर विभागीय नियंत्रकांनी या योजनेची माहिती देताना सांगितले की, 'ST Sange Tirthatan'  या योजनेअंतर्गत राज्य शासनाने एसटी प्रवासासाठी विविध सामाजिक घटकांना दिलेल्या सर्व सवलती या सहलींसाठीही लागू राहणार आहेत. यामध्ये महिला आणि ज्येष्ठ नागरिकांना ५० टक्के सवलत दिली जाणार आहे.

श्रावण महिन्यात महादेव मंदिरांची स्थळे, अष्टविनायक दर्शन, जोतिर्लिंग दर्शन, नवरात्रीत साडेतीन शक्तिपीठांचे दर्शन, तुळजापूर, अक्कलकोट आणि पंढरपूर अशा विविध तीर्थक्षेत्रांच्या सहलींचे नियोजन करण्यात आले आहे. केवळ धार्मिकच नव्हे, तर पावसाळी पर्यटनासाठी मान्सून स्थळे, किल्ले सागरी पर्यटन तसेच चिखलदरा, ताडोबा यांसारख्या थंड हवेच्या ठिकाणीही मागणीनुसार बसेस चालवल्या जातील.

 

 

'ST Sange Tirthatan' या धार्मिक सहलींमध्ये मोफत प्रवासाची सुविधा मिळणार आहे. प्रत्येक आगारातून किमान ४० प्रवाशांचा गट तयार झाल्यास मागणीनुसार विशेष बसेस उपलब्ध करून दिल्या जाणार आहेत. प्रवाशांच्या प्रतिसादानुसार एक किंवा त्यापेक्षा जास्त दिवसांचे मार्ग निश्चित केले जातील आणि भाडे अंतराप्रमाणे आकारले जाईल. प्रवाशांना अपघात सहायता निधी योजनेचे कवचही या प्रवासादरम्यान मिळणार आहे. सहलींसाठी एसटी महामंडळाच्या संकेतस्थळावर आगाऊ आरक्षणाची सोय करण्यात आली आहे. किमान ३५ सीटचे आरक्षण झाल्यास सहल नियोजित वेळेत सुटेल, अन्यथा प्रवाशांना १०० टक्के परतावा किंवा तारीख बदलून घेण्याचा पर्याय उपलब्ध असेल.