५० हजारांचे बक्षीस असलेला रिहान अन्सारी चकमकीत ठार

Rihan Ansari killed in encounter उत्तर प्रदेशातील शामली जिल्ह्यात गुरुवारी रात्री उशिरा पोलिस आणि कुख्यात गुन्हेगारांमध्ये झालेल्या चकमकीत रिहान अन्सारी ठार झाला. या कारवाईदरम्यान त्याचा एक साथीदार मात्र अंधाराचा फायदा घेत फरार झाला. रिहान अन्सारीवर ५० हजार रुपयांचे बक्षीस जाहीर करण्यात आले होते आणि तो अनेक वर्षांपासून पोलिसांच्या शोधात होता. चकमकीदरम्यान दोन्ही बाजूंनी झालेल्या जोरदार गोळीबारात शामली पोलीस ठाण्यातील कॉन्स्टेबल सुमित जखमी झाला असून, त्याच्यावर उपचार सुरू आहेत.

 

 

शामलीचे पोलीस अधीक्षक एन. पी. सिंह यांनी दिलेल्या माहितीनुसार, गुरुवारी रात्री पोलिसांना गोपनीय माहिती मिळाली होती की दोन सराईत गुन्हेगार दुचाकीवरून झिन्झाना भागातून कासेरवा गावाच्या दिशेने दरोडा टाकण्याच्या तयारीत आहेत. ही माहिती मिळताच स्थानिक पोलीस पथक आणि स्पेशल ऑपरेशन ग्रुप तातडीने घटनास्थळी रवाना झाले. पोलिसांनी संशयितांना थांबवण्याचा प्रयत्न केला असता गुन्हेगारांनी थेट गोळीबार सुरू केला. त्याला प्रत्युत्तर देत पोलिसांनीही कारवाई केली. या चकमकीत दिल्लीसह अनेक राज्यांत वाँटेड असलेला रिहान अन्सारी गंभीर जखमी झाला. त्याला तात्काळ जिल्हा रुग्णालयात नेण्यात आले, मात्र डॉक्टरांनी त्याला मृत घोषित केले.

 

पोलिसांच्या माहितीनुसार, रिहान अन्सारीवर शामली, बागपत, गाझियाबाद, दिल्ली आणि हरियाणा येथे दरोड्यासह विविध गंभीर स्वरूपाचे ९० हून अधिक गुन्हे दाखल आहेत. तो गेल्या दहा वर्षांहून अधिक काळ आपल्या टोळीचा सूत्रधार होता आणि कुख्यात याह्या टोळीशीही त्याचे संबंध असल्याचे समोर आले आहे. त्याच्या गुन्हेगारी कारवायांचा सविस्तर तपशील पोलिसांकडून तपासला जात आहे.