देशभरात इंधन आणि गॅसचा तुटवडा! ठिकठिकाणी रांगा

Fuel and gas shortage देशातील गॅस आणि इंधन पुरवठ्याला मध्यपूर्वेतील युद्धाचा थेट परिणाम दिसत आहे. एलपीजी गॅस, पेट्रोल आणि डिझेलचा तुटवडा अनेक शहरांमध्ये जाणवू लागला आहे. दिल्लीमध्ये गॅस सिलिंडर उपलब्ध नाहीत तर मुंबईतील लोकांनाही पुरवठ्यात अडचणी येत आहेत. एलपीजी सिलिंडरच्या किमती वाढल्याने नागरिक आता स्वयंपाकासाठी इलेक्ट्रिक उपकरणांचा पर्याय स्वीकारत आहेत. बाजारात इलेक्ट्रिक कुकर, मायक्रोवेव्ह ओव्हन, टोस्टर, ग्रिल, एअर फ्रायर, मल्टी-कुकर, इलेक्ट्रिक तवा आणि हॉट प्लेटसारख्या उपकरणांची मागणी सतत वाढत आहे. केंद्र सरकारने ७ मार्च रोजी घरगुती आणि व्यावसायिक गॅस सिलिंडरच्या किमती वाढवल्या, ज्यामुळे परिस्थिती आणखी बिकट झाली. व्यावसायिक गॅस पुरवठ्यालाही परिणाम झाला असून, ग्राहकांना सिलिंडर बुक करण्यास अडचण येत आहे. महाराष्ट्र, उत्तर प्रदेश आणि बिहारसह अनेक ठिकाणी सिलिंडरसाठी लांब रांगा लागल्या आहेत.

 

 

 

दिल्लीसह एनसीआरमध्ये देखील एलपीजी सिलिंडरसाठी रांगा दिसत आहेत. लोकांना गॅस बुक करता येत नाही किंवा मिळत नाही, तर टोल-फ्री क्रमांकदेखील सतत बंद असल्याने लोक ऑनलाइनही बुकिंग करण्यात अडचणींना सामोरे जात आहेत. त्यामुळे नागरिकांमध्ये सावधगिरी वाढली असून, पर्यायी स्वयंपाक पद्धतीकडे वळले आहे.मुंबईतील अनेक हॉटेल्स आणि रेस्टॉरंट्ससाठी एलपीजी पुरवठा कमी करण्यात आला आहे. ६ मार्चपासून ८० टक्के पर्यंत व्यावसायिक पुरवठा थांबवण्यात आला आहे. या संकटाचा परिणाम ऐतिहासिक हॉटेल्सनाही जाणवत आहे. फोर्ट परिसरातील १७८ वर्ष जुने पंचम पुरीवाला हॉटेल आता फक्त दोन पदार्थ पुरवते, कारण गॅसचा साठा खूपच मर्यादित आहे. महानगर गॅस लिमिटेडने स्पष्ट केले आहे की सध्या कंपनीच्या कार्यरत क्षेत्रात गॅस पुरवठा सामान्य आहे, मात्र युद्धामुळे एलएनजी आयात खंडित झाल्यास औद्योगिक आणि व्यावसायिक ग्राहकांवर परिणाम होऊ शकतो. याशिवाय पेट्रोल पंपांवरही गर्दी दिसून येत आहे. भोपाळसह अनेक शहरांमध्ये नागरिकांना पेट्रोल भरण्यासाठी मोठा वेळ वाट पाहावा लागत आहे, ज्यामुळे देशभरात इंधन आणि गॅसचा तुटवडा गंभीर समस्या बनला आहे.