अमेरिकेला इशारा...खार्ग बेटावरील हल्ल्याचे इराण देणार प्रतिउत्तर!

Iran will respond to the Kharg attack मध्यपूर्वेत तणाव अधिक तीव्र होत असून अमेरिका आणि इराण यांच्यातील संघर्ष नव्या टप्प्यावर पोहोचला आहे. डोनाल्ड ट्रम्प यांनी अमेरिकन सैन्याने खार्ग बेट येथे जोरदार हल्ला केल्याचा दावा केल्यानंतर तेहरानकडून कठोर इशारा देण्यात आला आहे. या बेटावरील लष्करी व ऊर्जा संबंधित ठिकाणांवर झालेल्या कारवाईमुळे इराणमध्ये संताप व्यक्त होत असून तेथील लष्करी नेतृत्वाने स्पष्ट शब्दांत प्रत्युत्तराची धमकी दिली आहे. इराणच्या खातम अल-अंबिया मुख्यालयच्या प्रवक्त्याने सांगितले की देशातील तेल, अर्थव्यवस्था किंवा ऊर्जा क्षेत्राशी संबंधित कोणत्याही ठिकाणांवर पुन्हा हल्ला झाला तर इराण लगेचच प्रतिहल्ला करेल. अशा कारवाईत अमेरिकेशी संबंध असलेल्या किंवा वॉशिंग्टनच्या मदतीने चालणाऱ्या प्रादेशिक रचनांना लक्ष्य केले जाईल, असा इशाराही देण्यात आला आहे.

 

 

इराणच्या लष्करी अधिकाऱ्यांच्या मते, जर त्यांच्या ऊर्जा साधनांवर आघात झाला तर त्याच प्रकारच्या ठिकाणांवर उत्तर देणे अपरिहार्य ठरेल.दरम्यान, अमेरिकेने मध्यपूर्व भागात लष्करी हालचाली वाढवल्या असून सुमारे अडीच हजार सैनिक आणि उभयचर हल्ला जहाज पाठवण्याचे आदेश दिल्याची माहिती समोर आली आहे. तज्ज्ञांच्या मते खार्ग बेट इराणच्या अर्थव्यवस्थेसाठी अत्यंत महत्त्वाचे मानले जाते. या बेटावरून देशाच्या कच्च्या तेलाच्या निर्यातीचा मोठा भाग जगभर पाठवला जातो. अंदाजे नव्वद टक्के तेल येथे जहाजांवर चढवून परदेशात पाठवले जाते, त्यामुळे या ठिकाणावरील सुविधांवर हल्ला झाल्यास इराणच्या महसुलावर तात्काळ परिणाम होऊ शकतो.

 

 

ऊर्जा क्षेत्रातील अभ्यासकांचे मत आहे की या बेटावरील तेलसुविधांवर मोठ्या प्रमाणात नुकसान झाल्यास परिस्थिती अधिक धोकादायक बनू शकते. त्याला प्रत्युत्तर म्हणून होर्मुझ सामुद्रधुनी किंवा आखाती देशांमधील ऊर्जा व्यवस्थांवर मोठे हल्ले होण्याची शक्यता व्यक्त केली जात आहे. यापूर्वीच इस्लामिक रिव्होल्यूशनरी गार्ड कॉर्प्सने चेतावणी दिली होती की त्यांच्या ऊर्जा व्यवस्थांवर अगदी छोटा हल्ला झाला तरी संपूर्ण प्रदेशातील तेल व वायू व्यवस्थांवर गंभीर परिणाम करणारी कारवाई केली जाऊ शकते. त्यामुळे या संघर्षामुळे मध्यपूर्वेत अस्थिरतेचे वातावरण अधिकच वाढण्याची भीती व्यक्त केली जात आहे.