पश्चिम बंगालमध्ये मोठे प्रशासनिक फेरबदल; सिद्धनाथ गुप्ता नवे डीजीपी

Major administrative reshuffle in West Bengal पश्चिम बंगालमध्ये आगामी निवडणुकांच्या पार्श्वभूमीवर निवडणूक आयोगाने प्रशासनात मोठे फेरबदल केले आहेत. राज्यातील वरिष्ठ अधिकाऱ्यांच्या जबाबदाऱ्यांमध्ये बदल करत काही महत्त्वाच्या पदांवर नव्या नियुक्त्या जाहीर करण्यात आल्या आहेत. या निर्णयानुसार सिद्धनाथ गुप्ता यांची राज्याच्या पोलीस महासंचालकपदी नियुक्ती करण्यात आली असून अजय नंदा यांना कोलकाता पोलीस आयुक्तपदाची जबाबदारी देण्यात आली आहे.निवडणुकीच्या कार्यक्रमाची घोषणा झाल्यानंतर आयोगाने राज्यातील काही प्रमुख प्रशासकीय अधिकाऱ्यांनाही बदलण्याचे आदेश दिले. पश्चिम बंगालच्या मुख्य सचिव नंदिनी चक्रवर्ती आणि गृहसचिव जगदीश प्रसाद मीना यांची बदली करण्यात आली असून त्यांना निवडणुकीशी संबंधित कोणत्याही कामात सहभागी होता येणार नाही, असे स्पष्ट करण्यात आले आहे.

 

 

 

या बदलांनंतर १९९३ तुकडीतील वरिष्ठ प्रशासकीय अधिकारी दुष्यंत नारियाला यांची नवीन मुख्य सचिव म्हणून नियुक्ती करण्यात आली आहे. त्याचप्रमाणे संघमित्रा घोष यांना राज्याच्या गृहसचिवपदाची जबाबदारी देण्यात आली आहे. आयोगाने जगदीश प्रसाद मीना यांच्या जागी त्यांची नियुक्ती केली आहे. निवडणुकीच्या काळात प्रशासन निष्पक्ष आणि पारदर्शक राहावे यासाठी आयोगाकडून हे बदल करण्यात आल्याचे सांगितले जात आहे. या निर्णयामुळे राज्यातील प्रशासनिक व्यवस्थेत मोठे बदल झाले असून आगामी निवडणुका लक्षात घेता व्यवस्था अधिक सक्षम करण्याचा प्रयत्न करण्यात आला आहे.