ऊर्जा प्रकल्पांवर आता हल्ला केल्यास कठोर प्रत्युत्तर देणार!

Iran's final warning to Israel मध्य-पूर्वेत तणाव दिवसेंदिवस वाढत असून अमेरिका, इस्रायल आणि इराण यांच्यातील संघर्षाने परिस्थिती अधिकच गंभीर बनली आहे. या पार्श्वभूमीवर इराणचे परराष्ट्र मंत्री सय्यद अब्बास अराघची यांनी इस्रायलला स्पष्ट इशारा देत पुन्हा हल्ला झाल्यास कठोर आणि तीव्र प्रत्युत्तर दिले जाईल, असे ठामपणे सांगितले आहे. इराणच्या परराष्ट्र मंत्र्यांनी आपल्या भूमिकेत बदल करत संयमाची मर्यादा संपली असल्याचे नमूद केले आहे. त्यांच्या म्हणण्यानुसार, जर इस्रायलने पुन्हा इराणच्या ऊर्जा प्रकल्पांवर किंवा महत्त्वाच्या पायाभूत सुविधांवर हल्ला केला, तर इराण ‘शून्य संयम’ धोरण स्वीकारेल आणि त्याला अत्यंत तीव्र प्रतिसाद दिला जाईल.

 

 

 

ही चेतावणी अशा वेळी देण्यात आली आहे, जेव्हा इराणने कतारमधील रास लाफान येथील वायू प्रकल्पावर हल्ला केल्यामुळे जागतिक पातळीवर चिंता निर्माण झाली आहे. या हल्ल्यामुळे कतारच्या द्रवरूप नैसर्गिक वायू निर्यात क्षमतेवर मोठा परिणाम होण्याची शक्यता असून, त्यामुळे युरोप, आशिया आणि इतर भागांतील ऊर्जा पुरवठ्यावर परिणाम होऊ शकतो, अशी भीती व्यक्त केली जात आहे. अराघची यांनी आपल्या वक्तव्यात पुढे असेही म्हटले आहे की, आंतरराष्ट्रीय पातळीवरील तणाव कमी करण्याच्या आवाहनांमुळे आतापर्यंत संयम बाळगण्यात आला होता, मात्र आता परिस्थिती बदलली असून इराण कोणतीही हानी सहन करणार नाही. त्यांनी इशारा दिला की, इराणच्या नागरी आणि पायाभूत सुविधांना झालेल्या नुकसानीची भरपाई केल्याशिवाय परिस्थिती शांत होणार नाही. इराणने स्पष्ट शब्दांत सांगितले आहे की, त्यांच्यावर पुन्हा हल्ला झाल्यास ते अधिक आक्रमक पद्धतीने प्रत्युत्तर देतील. या घडामोडींमुळे संपूर्ण जगाचे लक्ष मध्य-पूर्वेकडे वेधले गेले असून, परिस्थिती आणखी बिघडण्याची शक्यता वर्तवली जात आहे.