इराणबद्दल आपुलकी वाटत असेल तर इराणलाच जा!

Controversy in Pakistan over Munir's statement पाकिस्तानात शिया धर्मगुरूंना दिलेल्या कथित वक्तव्यामुळे मोठी खळबळ उडाली आहे. संरक्षण दल प्रमुख फील्ड मार्शल आसिम मुनीर यांनी शिया समुदायाच्या धर्मगुरूंशी झालेल्या बैठकीत वादग्रस्त टिप्पणी केल्याचा आरोप करण्यात आला असून, या घटनेमुळे देशात चर्चांना उधाण आले आहे. रावळपिंडी येथील मुख्य लष्करी कार्यालयात झालेल्या या बैठकीत अनेक शिया धर्मगुरू उपस्थित होते. या बैठकीला उपस्थित असलेल्या एका धर्मगुरूने दावा केला आहे की, आसिम मुनीर यांनी शिया समुदायाला उद्देशून असे म्हटले की, जर त्यांना इराणबद्दल अधिक आपुलकी वाटत असेल तर त्यांनी इराणला जावे. या वक्तव्यामुळे शिया समुदायात नाराजी व्यक्त केली जात आहे. येथे इराण आणि देशातील अंतर्गत परिस्थितीवर चर्चा झाली. मात्र, बैठकीतील काही वक्तव्ये नंतर बाहेर आल्याने वाद निर्माण झाला आहे.

 

त्याच वेळी, बैठकीत काही आंदोलनांवर आणि देशातील काही घटनांवरही चर्चा झाली. काही ठिकाणी झालेल्या हिंसाचारावरही नाराजी व्यक्त करण्यात आली. मात्र, धर्मगुरूंनी लष्करात शिया अधिकारी असल्याची आठवण करून दिल्यानंतर वातावरण काहीसे शांत झाल्याचे सांगितले जाते.नंतर पुन्हा या वादग्रस्त वक्तव्याचा उल्लेख झाल्याने परिस्थिती अधिक गंभीर झाल्याचे दिसून आले. धर्मगुरूंनी या वक्तव्यावर तीव्र नाराजी व्यक्त केली असून, शिया समुदायावर अन्याय होत असल्याचा आरोप केला आहे.या प्रकरणामुळे पाकिस्तानमध्ये राजकीय आणि सामाजिक वातावरण तापले असून, विविध स्तरांवर प्रतिक्रिया उमटत आहेत. पुढील काळात या वादावर काय भूमिका घेतली जाते याकडे सर्वांचे लक्ष लागले आहे.