विधान सभेत मुख्यमंत्र्यांचा कडक इशारा 'कोणी वाचणार नाही'

 

 

सभागृहात विरोधकांनी अशोक खरात प्रकरणाचे अनेक पैलू मांडले. काँग्रेसचे नेते विजय वडेट्टीवार यांनी प्रस्तावात खरातच्या बाबतीत व्हिडीओ क्लिप्स, अनेक महिलांच्या तक्रारी आणि काही प्रशासकीय अधिकाऱ्यांची नावे या सर्वांचा समावेश करून सविस्तर चर्चा करण्याची मागणी केली. विरोधकांच्या मते, हे प्रकरण फक्त एका व्यक्तीपुरते मर्यादित नसून त्याच्या जवळपासच्या व्यक्तींचा देखील तपास करणे आवश्यक आहे. अनेक तथ्ये अजूनही गुपित असून याबाबत पूर्ण चौकशी होणे गरजेचे आहे.

काय म्हणाले मुख्यमंत्री?

मुख्यमंत्री फडणवीस यांनी विरोधकांच्या आरोपांना उत्तर देताना सांगितले की, खरात प्रकरणात पोलीस प्रशासनाने आधीपासूनच ट्रॅप तयार केला होता आणि त्यानंतरच कारवाई केली गेली. त्यांनी स्पष्ट केले की, मी नेहमी क्लिन चीट देत नाही; ज्याच्याकडे खरोखर क्लिन रिकॉर्ड आहे त्यालाच क्लिन चीट मिळते. या प्रकरणाशी दुरान्वये संबंध असलेल्यांनाही न्यायाच्या चौकटीत आणले जाईल. फडणवीसांचे हे वक्तव्य विधानसभेत तणाव निर्माण करणारे ठरले आणि विरोधकांनी पुन्हा एकदा अधिक चौकशीची मागणी केली.राज्य मंत्रिमंडळ आणि विरोधी पक्षांत या प्रकरणावर सध्या तीव्र चर्चा सुरू आहे. काही पक्ष या प्रकरणाला अधिक व्यापक स्वरूप देण्याचा प्रयत्न करत आहेत, तर काहींच्या मते सामाजिक दृष्टिकोनातूनही या प्रकरणाचा सविस्तर तपास करणे अत्यावश्यक आहे. विशेषत: महिलांच्या सुरक्षेच्या गुंतागुंतीबाबत स्पष्ट निष्कर्ष काढणे गरजेचे आहे. विधानसभेत या प्रकरणाची पुढील चर्चा आणि कारवाईवर सर्वांचे लक्ष लागून राहिले आहे.