पश्चिम आशियातील संकटातही भारताचा इंधन पुरवठा सुरळीत

India's fuel supply is stable पश्चिम आशियात सुरू असलेल्या संघर्षामुळे आंतरराष्ट्रीय पातळीवर कच्चे तेल आणि वायूचा पुरवठा विस्कळीत झाला असून, या पार्श्वभूमीवर भारताने आपल्या राजनैतिक कौशल्याचे उत्तम प्रदर्शन केले आहे. या कठीण परिस्थितीतही देशात ऊर्जा पुरवठा सुरळीत ठेवण्यासाठी विविध देशांशी समन्वय साधण्यात आला आहे. याच पार्श्वभूमीवर अमेरिकेतील एक मालवाहू जहाज मोठ्या प्रमाणात द्रवीकृत पेट्रोलियम वायू घेऊन मंगळुरू बंदरात दाखल झाले आहे. त्याआधीच रशियाकडून आलेले एक तेलवाहू जहाजही या बंदरात पोहोचले होते. या दोन्ही जहाजांमधून मोठ्या प्रमाणात इंधनाचा पुरवठा भारताला मिळत असल्याने देशातील ऊर्जा गरजा पूर्ण करण्यात मदत होत आहे.

 

 

 

अमेरिकेचे हे जहाज काही महिन्यांपूर्वी प्रवासाला निघाले होते आणि त्यामध्ये सुमारे सोळा हजार सातशे टनांहून अधिक द्रवीकृत वायू होता. हा वायू एजिस लॉजिस्टिक्स येथे उतरवण्यात आला आहे. तर रशियाचे जहाजदेखील मोठ्या प्रमाणात कच्चे तेल घेऊन भारतात दाखल झाले असून, हा टँकर मूळतः इतर देशासाठी नियोजित असतानाही नंतर भारताकडे वळवण्यात आला.या संघर्षामुळे होर्मुझच्या सामुद्रधुनीत अनेक जहाजे अडकून पडली असून, जागतिक तेल पुरवठ्यावर त्याचा मोठा परिणाम झाला आहे. मध्यपूर्वेतील या मार्गातून होणाऱ्या तेल पुरवठ्यावर अडथळे निर्माण झाल्याने आंतरराष्ट्रीय बाजारात कच्च्या तेलाच्या किमती वाढत आहेत आणि एलपीजीच्या उपलब्धतेवरही परिणाम दिसून येत आहे.

 

 

मंगळूर हे देशातील एक महत्त्वाचे एलपीजी साठवण केंद्र असून, येथे मोठ्या प्रमाणात वायू साठवला जातो. समुद्रसपाटीखाली असलेली ही सुविधा देशाच्या ऊर्जा साठ्यासाठी अत्यंत महत्त्वाची मानली जाते. या ठिकाणाहून देशभरात एलपीजीचा पुरवठा केला जातो. तज्ज्ञांच्या मते, विविध देशांकडून सातत्याने होणारा इंधन पुरवठा भारताच्या ऊर्जा सुरक्षेला बळकटी देणारा ठरत आहे. अशा आंतरराष्ट्रीय संकटांच्या काळातही भारत आपली ऊर्जा गरज भागवण्यासाठी सक्षम असल्याचे या घडामोडींमधून स्पष्ट होत आहे.