दिल्लीमध्ये आंतरराष्ट्रीय शस्त्र रॅकेटचा पर्दाफाश

Arms racket busted in Delhi दिल्लीमध्ये एका मोठ्या आंतरराष्ट्रीय शस्त्र तस्करी रॅकेटचा पर्दाफाश करण्यात आला असून, पोलिसांच्या गुन्हे शाखेने या कारवाईत अनेक आरोपींना अटक केली आहे. ही टोळी नेपाळमार्गे परदेशी शस्त्रांचा पुरवठा दिल्लीपर्यंत करत असल्याचे उघड झाले आहे. पोलिसांच्या माहितीनुसार, ही टोळी केवळ देशांतर्गत नव्हे तर आंतरराष्ट्रीय स्तरावरही कार्यरत होती. या प्रकरणात विविध देशांमधून आणलेली अत्याधुनिक शस्त्रे जप्त करण्यात आली असून, या नेटवर्कचा विस्तार पाकिस्तान, नेपाळ आणि बांगलादेशपर्यंत असल्याचे तपासात समोर आले आहे. सध्या या संपूर्ण साखळीचा शोध घेण्यासाठी तपास सुरू आहे.

 

 

या कारवाईदरम्यान पोलिसांनी सुमारे दहा जणांना अटक केली असून, त्यांच्याकडून मोठ्या प्रमाणात शस्त्रसाठा जप्त करण्यात आला आहे. यात २१ परदेशी बनावटीच्या पिस्तुलांचा समावेश असून, मशीनगन आणि स्वयंचलित पिस्तुलेही जप्त करण्यात आली आहेत. तसेच सुमारे दोनशे जिवंत काडतुसेही हस्तगत करण्यात आली आहेत. या शस्त्रांमध्ये झेक प्रजासत्ताक, तुर्की, चीन, इटली, ब्राझील आणि जर्मनी या देशांमध्ये बनवलेल्या आधुनिक पिस्तुलांचा समावेश आहे. काही शस्त्रे विशेष दलांकडून वापरली जाणारी असल्याचेही तपासात समोर आले आहे, ज्यामुळे या रॅकेटची धोकादायक क्षमता स्पष्ट होते.