पंतने 'या' क्रमांकावर करावी फलंदाजी? माजी कर्णधाराचा मोलाचा सल्ला

Rishabh Pant : इंडियन प्रीमियर लीगचा १९वा हंगाम २८ मार्च रोजी सुरू होईल. दरम्यान, लखनौ सुपर जायंट्स संघ १ एप्रिल रोजी आपल्या मोहिमेला सुरुवात करेल. एलएसजीचा कर्णधार ऋषभ पंत सध्या पहिल्या सामन्याची तयारी करत आहे. या सामन्यापूर्वी, दक्षिण आफ्रिकेचा माजी कर्णधार फॅफ डु प्लेसिसने पंतला काही मौल्यवान सल्ला दिला आहे. डु प्लेसिसच्या मते, आपल्या फलंदाजीचा प्रभाव वाढवण्यासाठी पंतने तिसऱ्या क्रमांकावर फलंदाजी करावी. त्याने असेही सुचवले की, पंतने जास्त जोखीम घेणे टाळावे आणि आपल्या फटक्यांवर नियंत्रण ठेवावे.

 

 

 

 

गेल्या हंगामात पंतची फलंदाजी विशेष प्रभावी नव्हती. आयपीएल २०२५ मध्ये पंतने वेगवेगळ्या स्थानांवर स्वतःला आजमावले, पण त्याला आपला लय सापडला नाही. तो कधी चौथ्या क्रमांकावर, कधी सलामीवीर म्हणून, तर कधी खालच्या क्रमांकावर फलंदाजीला आला. पण अखेरीस, तिसऱ्या क्रमांकावरच त्याने सर्वोत्तम कामगिरी केली. लखनौ सुपर जायंट्ससाठी शेवटच्या साखळी सामन्यात, तिसऱ्या क्रमांकावर फलंदाजी करताना त्याने ६१ चेंडूंमध्ये नाबाद ११८ धावा केल्या.

 

जिओस्टारच्या 'आयपीएल टुडे लाइव्ह' शोमध्ये बोलताना डु प्लेसिस म्हणाला की, पंतला तिसऱ्या क्रमांकावर फलंदाजी करण्याची संधी मिळू शकते. आकडेवारीनुसार, जर त्याला सर्वोत्तम कामगिरी करायची असेल, तर तिसरा क्रमांक त्याच्यासाठी सर्वोत्तम स्थान असेल. त्याचा विश्वास आहे की, या हंगामात तो एलएसजीसाठी तिसऱ्या क्रमांकावर फलंदाजी करेल, तर निकोलस पूरन चौथ्या क्रमांकावर खेळेल.

आरसीबीच्या माजी कर्णधाराने पुढे सांगितले की, २०२६ च्या लिलावासाठी एलएसजीची रणनीती आणि त्यांनी करारबद्ध केलेले खेळाडू पाहता, त्यांची फलंदाजीची फळी खूप मजबूत दिसत आहे. पंतसोबतच, एडन मार्कराम, मिचेल मार्श आणि पूरन हे त्यांचे प्रमुख खेळाडू आहेत. आयपीएल २०२६ ची सुरुवात शनिवार, २८ मार्च रोजी बंगळूरु येथे होईल, ज्यामध्ये गतविजेता रॉयल चॅलेंजर्स बंगळूरु सलामीच्या सामन्यात सनरायझर्स हैदराबादशी भिडेल, तर एलएसजी १ एप्रिल रोजी आपल्या घरच्या मैदानावर दिल्ली कॅपिटल्सविरुद्ध आपल्या मोहिमेला सुरुवात करेल.