शाळांमध्ये ‘रील्स’वर बंदी...सरकारचा कडक आदेश!

ban-on-reels-in-schools : दिल्ली सरकारने शाळांमध्ये विद्यार्थ्यांकडून होणाऱ्या रील्स आणि शॉर्ट व्हिडिओ तयार करण्यावर बंदी घालण्याचा महत्त्वाचा निर्णय घेतला आहे. शिक्षण संचालनालयाने (DoE) जारी केलेल्या परिपत्रकानुसार, शाळेच्या वेळेत विद्यार्थी, शिक्षक किंवा कर्मचारी यांनी कोणतेही रील्स किंवा मनोरंजनात्मक व्हिडिओ तयार करू नयेत, असे स्पष्ट निर्देश देण्यात आले आहेत.

 

 

 

सरकारने स्पष्ट केले की, अशा प्रकारच्या व्हिडिओमुळे शिक्षणात अडथळा निर्माण होतो आणि विद्यार्थ्यांचे लक्ष विचलित होते. त्यामुळे शाळांमधील शिस्त, सुरक्षितता आणि शैक्षणिक वातावरण अबाधित ठेवण्यासाठी हा निर्णय घेण्यात आला आहे.

 

मात्र, शैक्षणिक, सांस्कृतिक किंवा जनजागृतीशी संबंधित व्हिडिओ तयार करण्यास परवानगी देण्यात आली आहे, पण त्यासाठी संबंधित अधिकाऱ्यांची पूर्वपरवानगी आणि शिक्षकांच्या देखरेखीची अट घालण्यात आली आहे. तसेच, कोणतेही गैरशैक्षणिक किंवा प्रचारात्मक व्हिडिओ शाळेच्या परिसरात तयार करण्यास सक्त मनाई करण्यात आली आहे.

 

शाळा प्रशासनाला हे आदेश काटेकोरपणे पाळण्याचे निर्देश देण्यात आले असून, नियमांचे उल्लंघन केल्यास कडक कारवाई करण्यात येईल, असा इशाराही देण्यात आला आहे. या निर्णयामुळे शाळांमध्ये शिक्षणाला प्राधान्य देण्यावर भर दिला जाणार आहे.