अफगानिस्तान–पाकिस्तान सीमेलगत पुन्हा संघर्ष भडकला

Afghanistan–Pakistan conflict अफगानिस्तान आणि पाकिस्तान यांच्यातील सीमावाद पुन्हा एकदा चिघळला असून दोन्ही देशांच्या सीमेलगतच्या भागात हिंसाचार उफाळून आला आहे. अफगान प्रशासनाने पाकिस्तानच्या लष्करावर पूर्वेकडील असदाबाद परिसरात जोरदार तोफगोळे डागल्याचा आरोप केला आहे. या गोळीबारात एका व्यक्तीचा मृत्यू झाला असून अनेक जण जखमी झाल्याची माहिती समोर आली आहे.अफगान सरकारचे उपप्रवक्ते हमदुल्ला फितरत यांनी दिलेल्या माहितीनुसार, कुनार प्रांत मधील असदाबाद शहराच्या बाहेरील ग्रामीण भाग आणि नागरिकांच्या घरांवर हल्ला करण्यात आला.

 

प्राथमिक माहितीनुसार सुमारे सोळा जण जखमी झाले असून त्यामध्ये महिलां व लहान मुलांचा मोठा समावेश आहे. या हल्ल्यात मोर्टारसह इतर जड शस्त्रांचा वापर करण्यात आल्याचेही त्यांनी स्पष्ट केले.फेब्रुवारी महिन्याच्या अखेरीस सुरू झालेला हा संघर्ष गेल्या अनेक दशकांतील दोन्ही शेजारी देशांमधील सर्वात गंभीर लष्करी तणाव मानला जात आहे. पाकिस्तानचा आरोप आहे की अफगान तालिबान त्यांच्या भूमीत पाकिस्तानातील दहशतवादी गटांना आश्रय देत आहेत, जे पाकिस्तानमध्ये हल्ले घडवून आणतात. मात्र, काबूल प्रशासनाने हे सर्व आरोप ठामपणे फेटाळून लावले आहेत.

या संघर्षाची ठिणगी तेव्हा पडली, जेव्हा अफगानिस्तानने सीमापार कारवाई करत पाकिस्तानमध्ये छापे टाकले. अफगानिस्तानच्या मते, पाकिस्तानकडून झालेल्या हवाई हल्ल्यांना दिलेले हे प्रत्युत्तर होते आणि त्या हल्ल्यांमध्ये निरपराध नागरिकांचा बळी गेला होता. काही दिवसांपूर्वी अफगानिस्तानने असा दावाही केला होता की काबूलमधील व्यसनमुक्ती रुग्णालयावर पाकिस्तानच्या हवाई कारवाईत शेकडो लोक मृत्युमुखी पडले. मात्र, पाकिस्तानने हा आरोप नाकारत त्यांनी केवळ दारुगोळ्याच्या साठ्यावरच कारवाई केल्याचे म्हटले आहे.