सीएसकेच्या मिडल ऑर्डरला मोठा फटका

CSK's middle order suffers a blow आयपीएलच्या २०२६ हंगामाच्या सुरुवातीलाच चेन्नई सुपर किंग्स संघावर अडचणींचे सावट दिसून येत आहे. पहिलाच सामना खेळण्यापूर्वी संघाला एकामागून एक धक्के बसत असून प्रमुख खेळाडूंच्या दुखापतीमुळे संघरचना डळमळीत झाली आहे.आक्रमक फलंदाज डेवाल्ड ब्रेविस याला दुखापत झाल्यामुळे तो राजस्थानविरुद्धच्या पहिल्या सामन्यात खेळू शकणार नाही. गुवाहाटी येथे होणाऱ्या या सामन्यापूर्वी मुख्य प्रशिक्षक स्टीफन फ्लेमिंग यांनी ही माहिती दिली. बाजूच्या स्नायूला ताण आल्यामुळे ब्रेविस पुढील दोन ते तीन सामनेही गमावण्याची शक्यता आहे. त्यामुळे मधल्या फळीमध्ये बदल करण्याची वेळ संघावर येऊ शकते.

 

 

 

 

ब्रेविसने मागील हंगामात प्रभावी कामगिरी करत आपल्या फलंदाजीची छाप पाडली होती. काही मोजक्या सामन्यांत त्याने चांगली धावसंख्या उभी करत संघासाठी महत्त्वाची भूमिका बजावली होती. त्यामुळे त्याच्या अनुपस्थितीचा फटका संघाला बसण्याची शक्यता आहे.दरम्यान, संघाच्या अडचणी इथेच थांबत नाहीत. वेगवान गोलंदाज नॅथन एलिस दुखापतीमुळे संपूर्ण स्पर्धेबाहेर गेला आहे. त्याचबरोबर अनुभवी यष्टिरक्षक फलंदाज महेंद्र सिंग धोनी यालाही पायाच्या स्नायूच्या दुखापतीमुळे सुरुवातीच्या काही सामन्यांपासून दूर राहावे लागणार आहे.

 

 

अलीकडेच आंतरराष्ट्रीय स्पर्धेत ब्रेविसने दक्षिण आफ्रिकेकडून खेळताना चांगली कामगिरी केली होती. त्याच्या फलंदाजीमुळे तो चांगल्या लयीत असल्याचे दिसून आले होते. मात्र सध्या झालेल्या दुखापतीमुळे त्याचा फॉर्म संघाला उपयोगी पडू शकत नाही.गेल्या हंगामात अपेक्षेपेक्षा कमी यश मिळाल्यानंतर यंदा चांगली कामगिरी करण्याच्या उद्देशाने मैदानात उतरणाऱ्या चेन्नईसमोर आता सुरुवातीलाच मोठे आव्हान उभे राहिले आहे. सलग दुखापतींमुळे संघाचा समतोल बिघडला असून आगामी सामन्यांमध्ये या परिस्थितीचा कसा सामना केला जातो, याकडे सर्वांचे लक्ष लागले आहे.