नंदीग्रामसह दोन जागांवरून सुवेंदूंची एंट्री!

Suvendu's entry from two seats including Nandigram पश्चिम बंगाल विधानसभा निवडणुकीच्या पार्श्वभूमीवर राजकीय हालचालींना वेग आला असून विरोधी पक्षनेते सुवेंदू अधिकारी यांनी सोमवारी आपला उमेदवारी अर्ज दाखल केला. या वेळी केंद्रीय मंत्री धर्मेंद्र प्रधान हेही त्यांच्या सोबत उपस्थित होते, त्यामुळे या कार्यक्रमाला विशेष महत्त्व प्राप्त झाले. यंदाच्या निवडणुकीत सुवेंदू अधिकारी दोन महत्त्वाच्या मतदारसंघांतून मैदानात उतरले आहेत. भवानीपूर आणि नंदीग्राम या दोन्ही जागा राजकीयदृष्ट्या अत्यंत महत्त्वाच्या मानल्या जातात.

 

 

भवानीपूर हा ममता बॅनर्जी यांचा बालेकिल्ला समजला जातो, त्यामुळे येथे होणारी थेट लढत विशेष लक्षवेधी ठरणार आहे. दुसरीकडे, नंदीग्राम हा सुवेंदू अधिकारी यांचा मजबूत गड मानला जातो, जिथे त्यांनी मागील निवडणुकीत ममता बॅनर्जी यांचा पराभव केला होता.राज्यातील २९४ विधानसभा जागांसाठी मतदान दोन टप्प्यांत पार पडणार आहे. पहिला टप्पा २३ एप्रिलला तर दुसरा टप्पा २९ एप्रिलला होणार आहे. मतमोजणी ४ मे रोजी केली जाणार असून राज्यात कोट्यवधी मतदार मतदानाचा हक्क बजावणार आहेत. त्यासाठी हजारो मतदान केंद्रांची व्यवस्था करण्यात आली आहे. निवडणुकीची घोषणा होताच राज्यात आदर्श आचारसंहिता लागू झाली आहे. या निवडणुकीत प्रामुख्याने सत्ताधारी पक्ष आणि विरोधक यांच्यात थेट सामना होणार असल्याचे चित्र असून, आगामी दिवसांत राजकीय वातावरण अधिक तापण्याची चिन्हे दिसत आहेत.