सुरीनामचे माजी राष्ट्रपती चंद्रिकाप्रसाद संतोखी यांचे निधन

Chandrika Prasad Santokhi passes away दक्षिण अमेरिकेतील सुरीनाम देशाचे माजी राष्ट्रपती चंद्रिकाप्रसाद संतोखी यांचे वयाच्या ६७ व्या वर्षी अचानक निधन झाले. त्यांच्या निधनाची माहिती देशाच्या विद्यमान राष्ट्रपती जेनिफर सायमन यांनी अधिकृत निवेदनाद्वारे दिली. त्यांच्या मृत्यूचे नेमके कारण अद्याप जाहीर करण्यात आलेले नाही, मात्र सार्वजनिक जीवनातील त्यांचे दीर्घकाळचे योगदान स्मरणात राहील, अशा शब्दांत त्यांना श्रद्धांजली वाहण्यात आली.

 

 

२०२० ते २०२५ या कालावधीत त्यांनी राष्ट्रपतीपदाची धुरा सांभाळली. आपल्या कार्यकाळात त्यांनी देशाच्या आर्थिक स्थितीत सुधारणा करण्यासाठी आंतरराष्ट्रीय नाणेनिधीच्या मदतीने विविध धोरणात्मक निर्णय घेतले. राष्ट्रपतीपदाचा कार्यकाळ संपल्यानंतरही ते राजकारणात सक्रिय राहिले आणि खासदार म्हणून जनतेची सेवा करत राहिले. राजकीय कारकिर्दीपूर्वी ते पोलीस आयुक्त आणि न्यायमंत्री म्हणूनही कार्यरत होते. १९८२ मध्ये घडलेल्या चर्चित हत्याकांडाचा तपास पुढे नेण्यात त्यांनी महत्त्वाची भूमिका बजावली होती. २०२० च्या निवडणुकीत त्यांनी तत्कालीन राष्ट्रपती देसी बाउटर्स यांचा पराभव करत सत्तेवर प्रवेश केला होता.