“मला एकदा मिठी मार बेटा…” शहीद पूर्वेशच्या पार्थिवाला धरून आईचा आक्रोश

purvesh-durugkar-last-rites लष्करी सरावादरम्यान वायुदलाच्या सुखोई लढाऊ विमानाच्या अपघातात शहीद झालेले नागपूरचे सुपुत्र फ्लाइट लेफ्टनंट  पुर्वेश दुरगकर यांचे पार्थिव शनिवारी नागपूरमध्ये त्यांच्या न्यू सुभेदार लेआउट येथील घरी आणण्यात आले. तिरंग्यात गुंडाळलेल्या पार्थिवाचे दर्शन घेताच कुटुंबीयांचा आणि उपस्थित नागरिकांचा कंठ दाटून आला.

 

 

घराबाहेर “पूर्वेश दुर्गाकर अमर रहे” अशा घोषणांनी परिसर दुमदुमला होता. मात्र घराच्या आत आई आणि बहिणीच्या हंबरड्याने वातावरण अत्यंत हळवे झाले होते. परिसरातील प्रत्येक जण डोळ्यांत अश्रू घेऊन आपल्या वीर सुपुत्राला श्रद्धांजली अर्पण करत होता. पूर्वेश यांच्या अंत्ययात्रेत मोठ्या संख्येने नागरिक सहभागी झाले. शहीद झाल्याची बातमी समजल्यावर आई संध्या दुर्गाकर यांना मोठा धक्का बसला होता. तरीही त्या शेवटपर्यंत स्वतःला सावरून होत्या. मात्र पार्थिव मानेवाडा घाटावर पोहोचताच त्यांच्या आईचे दुःख अनावर झाले. “माझा मुलगा उठून एकदा मला मिठी मारावी,” अशी आर्त इच्छा त्या व्यक्त करत होत्या. पूर्वेश यांचे पार्थिव कोलकाता मार्गे नागपूरच्या सोनेगाव वायुदल तळावर आणण्यात आले. purvesh-durugkar-last-rites त्यानंतर लष्करी अधिकाऱ्यांनी सजवलेल्या लष्करी वाहनातून पार्थिव त्यांच्या घरी नेले. सहकारी सैनिकांनी खांद्यावर पार्थिव घेतल्याचा क्षण अत्यंत भावनिक होता. एका अधिकाऱ्याच्या डोळ्यांत अश्रू दाटून आले होते.

देशासाठी प्राण अर्पण करणाऱ्या या तरुण वैमानिकाला श्रद्धांजली वाहण्यासाठी नागरिक मोठ्या संख्येने जमले होते. पोलिस आणि लष्करी अधिकारी पार्थिवासोबत होते. “पूर्वेश अमर रहे” अशा घोषणांसह नागरिकांचा मोठा जमाव अंत्ययात्रेत सहभागी झाला. राज्य सरकारतर्फे जिल्हाधिकारी विपिन इटनकर यांनी पुष्पहार अर्पण करून श्रद्धांजली वाहिली. यावेळी वरिष्ठ वायुदल अधिकारी, पोलिस अधिकारी, लोकप्रतिनिधी तसेच मोठ्या संख्येने नागरिक उपस्थित होते. अंत्यसंस्कारापूर्वी वायुदलाच्या पथकाने शहीद पूर्वेश यांना विशेष सलामी दिली. सैनिकांच्या तुकडीने आकाशात गोळीबार करून आपल्या सहकाऱ्याला अखेरची मानवंदना दिली. त्यानंतर पूर्ण लष्करी सन्मानाने अंत्यसंस्कार करण्यात आले.

अंत्यसंस्कारानंतर पार्थिवावर लपेटलेला तिरंगा ध्वज, शिरटोपी आणि छायाचित्र लष्करी परंपरेनुसार कुटुंबाकडे सुपूर्द करण्यात आले. तिरंगा स्वीकारताच कुटुंबीयांचा संयम सुटला आणि सर्वांच्या डोळ्यांतून अश्रू वाहू लागले. अवघ्या २८ व्या वर्षी देशसेवेसाठी प्राण अर्पण करणाऱ्या पूर्वेश यांना लहानपणापासून सैन्याविषयी प्रचंड आदर होता. “मला एक महान सैन्य अधिकारी व्हायचे आहे,” असे ते नेहमी आईला सांगत असत. कठोर परिश्रमाने त्यांनी वायुदलात अधिकारी होण्याचे स्वप्न पूर्ण केले. पूर्वेश जवळजवळ रोज आपल्या आई-वडिलांशी संवाद साधत असत. purvesh-durugkar-last-rites मात्र एक दिवस तोच मुलगा तिरंग्यात गुंडाळून घरी परत येईल, याची कल्पनाही कुटुंबीयांनी केली नव्हती.

पूर्वेश यांची बहीण सायली अमेरिकेत राहते. भावाच्या निधनाची बातमी मिळताच ती नागपूरला आली. मुलीला पाहताच आईने तिला मिठी मारत आक्रोश केला, “आता तुझ्यासोबत मजा कोण करणार? तुला त्रास कोण देणार?” हा क्षण पाहून उपस्थित सर्वांच्या डोळ्यांत पाणी आले. या घटनेमुळे संपूर्ण नागपूर शहरात शोककळा पसरली. देशासाठी बलिदान देणाऱ्या या तरुण वीराला श्रद्धांजली वाहण्यासाठी नागरिक मोठ्या संख्येने जमले होते.

मात्र शहरात विविध कार्यक्रमांसाठी आलेल्या काही मंत्र्यांनी दुर्गाकर कुटुंबीयांची भेट घेतली नाही, याबाबत नागरिकांमध्ये नाराजी व्यक्त होत आहे. शहरात उपस्थित असूनही त्यांनी कुटुंबाचे सांत्वन करण्यासाठी वेळ न दिल्याची चर्चा नागपुरात सुरू आहे. देशसेवेसाठी सर्वोच्च बलिदान देणाऱ्या नागपूरच्या सुपुत्राला अखेरचा निरोप देताना संपूर्ण शहर दुःखात बुडाले होते. त्यांच्या शौर्यपूर्ण बलिदानाची आठवण नागरिकांच्या मनात कायम राहणार आहे.