लॉयड्स काली अम्माल मेमोरियल रुग्णालयाची दुहेरी कामगिरी

Lloyds Kaly Ammal Memorial Hospital ग्रामीण आरोग्यसेवेत महत्त्वपूर्ण प्रगती साधत हेडरी येथील लॉयड्स काली अम्माल मेमोरियल रुग्णालयाने दोन मोठे टप्पे गाठले आहेत. रुग्णालयात एपिड्युरल अ‍ॅनेस्थेशियाच्या सहाय्याने वेदनारहित सामान्य प्रसूती यशस्वीरीत्या पार पडली असून 400 व्या सुरक्षित बाळाच्या जन्माचाही आनंद साजरा करण्यात आला आहे. या दोन्ही यशस्वी घटनांमुळे गडचिरोलीतील मातृ व नवजात आरोग्य सेवेत सकारात्मक परिवर्तन होत असल्याचे दिसून येते.

 

 

अलीकडील एपिड्युरल सहाय्यित सामान्य प्रसूती ही ग्रामीण भागात सुरक्षित, आरामदायक आणि सन्मानजनक प्रसूती सुनिश्‍चित करण्याच्या दृष्टीने एक महत्त्वाची पायरी आहे. ही प्रक्रिया कोणत्याही गुंतागुंतीशिवाय पार पडली. एपिसिओटॉमीची गरज पडली नाही, पेरिनियल टिअर झाले नाहीत आणि प्रसूतीनंतर रक्तस्राव झाला नाही. तसेच ‘डिलेयड कॉर्ड क्लॅम्पिंग’ आणि वाय-फाय सक्षम मॉनिटरिंगसारख्या आधुनिक पद्धतींचा वापर करण्यात आला, ज्यामुळे आई आणि बाळ दोघेही सुरक्षित आणि निरोगी आहेत.

यासोबतच रुग्णालयाने 400 व्या सुरक्षित प्रसूतीचा टप्पाही गाठला आहे. गार्देवाडा येथील 19 वर्षीय सविता टोप्पो यांना उच्च-जोखीम गर्भावस्थेमुळे आरोग्य केंद्र गट्टा येथून रेफर करण्यात आले होते. परिस्थितीची गंभीरता लक्षात घेऊन डॉक्टरांनी तातडीने हस्तक्षेप करत 15 एप्रिल 2026 रोजी बाळाचा सुरक्षित जन्म घडवून आणला. सध्या माता व बाळ दोघेही सुरक्षित असून त्यांची योग्य काळजी घेतली जात आहे. ही दोन्ही यशस्वी कामगिरी एलकेएएम रुग्णालयाच्या वाढत्या क्षमतेचे आणि दुर्गम व आदिवासी भागातील नागरिकांना मोफत, गुणवत्तापूर्ण व सुलभ आरोग्यसेवा देण्याच्या बांधिलकीचे द्योतक आहे. स्थापनेपासूनच हे रुग्णालय हजारो कुटुंबांसाठी जीवनदायी ठरत आहे.

लॉयड्स मेटल्स अँड एनर्जी लिमिटेडचे व्यवस्थापकीय संचालक बी. प्रभाकरन यांच्या सर्वांसाठी सुलभ आणि दर्जेदार आरोग्यसेवा या दृष्टीकोनातून ही सेवा विकसित झाली आहे. तसेच लॉयड्स इन्फिनिट फाउंडेशनच्या संचालिका कीर्ती रेड्डी यांच्या मार्गदर्शनाखाली रुग्णकेंद्रित आणि संवेदनशील सेवांवर विशेष भर दिला जात आहे.अत्याधुनिक वैद्यकीय तंत्रज्ञान आणि कुशल तज्ज्ञांच्या सहाय्याने एलकेएएम रुग्णालय ग्रामीण भारतातील मातृत्व सेवांना नवी दिशा देत आहे. वेदनारहित प्रसूती आणि 400 सुरक्षित जन्मांचा टप्पा ही समर्पित आरोग्यसेवेची ताकद दर्शवणारी यशोगाथा असून, दुर्गम भागातही आशा, विश्‍वास आणि उत्तम आरोग्य परिणाम घडवून आणत आहे.

लॉयड्स काली अम्माल मेमोरियल रुग्णालय हे गडचिरोली जिल्ह्यातील हेडरी येथे स्थित मल्टिस्पेशालिटी आरोग्य केंद्र असून ते लॉयड्स इन्फिनिट फाउंडेशन (लॉयड्स मेटल्स अँड एनर्जी लिमिटेडचा सीएसआर उपक्रम) द्वारे संचालित आहे. मोफत आणि उच्च दर्जाची आरोग्यसेवा देण्याच्या उद्देशाने हे रुग्णालय ग्रामीण व आदिवासी भागातील नागरिकांसाठी महत्त्वपूर्ण आरोग्यसेवा केंद्र म्हणून कार्यरत आहे.