जेलमधून निवडणूक जिंकणाऱ्या कोल्हेंना अखेर जामीन

जळगावचे माजी महापौर ललित कोल्हे यांना अखेर मोठा कायदेशीर दिलासा मिळाला आहे. बनावट कॉल सेंटर प्रकरणात सर्वोच्च न्यायालयाने त्यांना जामीन मंजूर केला आहे. मागील सात महिन्यांपासून ते नाशिकच्या कारागृहात न्यायालयीन कोठडीत होते. त्यांच्या सुटकेची माहिती त्यांच्या पुत्राने दिल्यानंतर समर्थकांमध्ये समाधानाचे वातावरण निर्माण झाले आहे. या प्रकरणाची सुरुवात सप्टेंबर महिन्यात झाली होती. जळगाव शहराजवळील ममुराबाद रस्त्यावर असलेल्या त्यांच्या फार्महाऊसवर बेकायदेशीर कॉल सेंटर सुरू असल्याची माहिती पोलिसांना मिळाली होती. त्यानुसार छापा टाकण्यात आला असता, तेथे मोठ्या प्रमाणात संगणक आणि इतर उपकरणे आढळून आली. प्राथमिक तपासात हे कॉल सेंटर परदेशातील नागरिकांना फसवून आर्थिक लाभ मिळवण्यासाठी चालवले जात असल्याचे उघड झाले.

 

 

 

 

या केंद्रात काम करणारे कर्मचारी स्वतःला अधिकृत प्रतिनिधी म्हणून सादर करत विविध सेवा, ऑफर्स किंवा माहिती पडताळणीच्या नावाखाली लोकांकडून पैसे उकळत होते. पोलिसांच्या तपासात आर्थिक व्यवहारांचे काही पुरावेही समोर आले होते. यानंतर कोल्हे यांच्यासह इतरांवर गुन्हा दाखल करून त्यांना अटक करण्यात आली होती. दरम्यान, कारागृहात असतानाच त्यांनी स्थानिक स्वराज्य संस्थेची निवडणूक लढवून विजय मिळवला होता. मात्र, जामीन न मिळाल्याने त्यांच्या सुटकेबाबत अनिश्चितता होती. अखेर सर्वोच्च न्यायालयात सुनावणीदरम्यान त्यांना जामीन मंजूर करण्यात आला. आदेशाची अधिकृत प्रत मिळाल्यानंतर पुढील प्रक्रिया पूर्ण होऊन ते लवकरच कारागृहाबाहेर येणार आहेत.