पंजाबची विकेट, आरसीबीला प्लेऑफचे तिकीट!

PBKS vs RCB : इंडियन प्रीमियर लीगच्या १९व्या हंगामातील ६१वा साखळी सामना धर्मशाला स्टेडियमवर पंजाब किंग्स आणि रॉयल चॅलेंजर्स बंगळूर यांच्यात खेळला गेला. आरसीबीने हा सामना २३ धावांनी जिंकून प्लेऑफमधील आपले स्थान निश्चित केले. पंजाब किंग्सचा कर्णधार श्रेयस अय्यरने नाणेफेक जिंकून प्रथम गोलंदाजी करण्याचा निर्णय घेतला. यानंतर, आरसीबीने २० षटकांत ४ गडी गमावून २२२ धावा करत उत्कृष्ट फलंदाजीचे प्रदर्शन केले.

 

 

 

 

 

सामन्याची सुरुवात आरसीबीसाठी खराब झाली, २१ धावांवर जेकब बेथेलने त्यांची पहिली विकेट घेतली. यानंतर, विराट कोहली आणि देवदत्त पडिक्कल यांनी आक्रमक फलंदाजी करत धावसंख्या झपाट्याने वाढवली. या दोघांनी दुसऱ्या विकेटसाठी ७६ धावांची भागीदारी केली, ज्यात पडिक्कल बाद होण्यापूर्वी ४५ धावा करत होता. येथून पुढे कोहलीला व्यंकटेश अय्यरची साथ मिळाली आणि धावांचा वेग कायम राहिला. कोहली आणि व्यंकटेश यांनी तिसऱ्या विकेटसाठी ६० धावांची भागीदारी केली. विराट कोहली ५८ धावांवर बाद झाला. डावाच्या शेवटच्या षटकांमध्ये फलंदाजीला आलेल्या टीम डेव्हिडने व्यंकटेश अय्यरसोबत चौथ्या विकेटसाठी ३० चेंडूंमध्ये ६५ धावा जोडून धावसंख्या २२२ पर्यंत पोहोचवली. व्यंकटेश अय्यरने ४० चेंडूंमध्ये नाबाद ७३ धावा केल्या, तर टीम डेव्हिडने १२ चेंडूंमध्ये २८ धावा केल्या. पंजाब किंग्सकडून हरप्रीत ब्रारने दोन, तर अर्शदीप सिंग आणि युझवेंद्र चहलने प्रत्येकी एक बळी घेतला.

 

लक्ष्याचा पाठलाग करताना पंजाब किंग्सची सुरुवात खराब झाली आणि १९ धावांवर त्यांनी तीन महत्त्वाच्या विकेट गमावल्या. येथून कूपर कॉनोली आणि सूर्यांश शेडगे यांनी डाव सावरण्याचा प्रयत्न केला, पण कॉनोली ३७ धावा करून पॅव्हेलियनमध्ये परतला आणि सूर्यांशने ३५ धावा केल्या. पंजाब किंग्सने ९३ धावांवर ५ गडी गमावले. मार्कस स्टोइनिस आणि शशांक सिंग यांनी सहाव्या विकेटसाठी ६७ धावांची जलद भागीदारी करून संघाला सामन्यात परत आणण्याचा प्रयत्न केला, पण दोघांनाही विजय मिळवण्यात यश आले नाही. या सामन्यात पंजाब किंग्सला २० षटकांत केवळ १९९ धावांपर्यंतच मजल मारता आली. आरसीबीकडून रसिक सलाम दारने ३ तर भुवनेश्वर कुमारने २ बळी घेतले, याशिवाय जोश हेझलवूड, सुयश शर्मा आणि रोमॅरिओ शेफर्ड यांनी प्रत्येकी १ बळी घेतला.