सावधान! आवश्यक औषधे तत्काळ घेऊन ठेवा

Online medicine ऑनलाईन औषध विक्रीला विरोध करत देशभरातील औषध विक्रेत्यांनी २० मे रोजी एक दिवसीय देशव्यापी बंदची हाक दिली असून, या आंदोलनात महाराष्ट्रासह नागपूर विभागातील हजारो औषध दुकाने सहभागी होणार आहेत. अखिल भारतीय केमिस्ट अँड ड्रगिस्ट असोसिएशनच्या नेतृत्वाखाली होणाऱ्या या आंदोलनामुळे औषध पुरवठ्यावर परिणाम होण्याची शक्यता व्यक्त होत असतानाच अन्न व औषध प्रशासनाने अत्यावश्यक सेवा सुरळीत ठेवण्यासाठी तयारी सुरू केली आहे.

 

 

ऑनलाईन फार्मसी कंपन्यांकडून होत असलेल्या कथित नियमबाह्य औषध विक्रीविरोधात औषध विक्रेते आक्रमक झाले आहेत. डॉक्टरांच्या प्रिस्क्रिप्शनची योग्य पडताळणी न करता औषध विक्री केली जात असल्याचा आरोप संघटनांकडून करण्यात येत आहे. तसेच मोठ्या ई-फार्मसी कंपन्यांकडून दिल्या जाणाऱ्या सवलतींमुळे लहान आणि मध्यम औषध विक्रेत्यांच्या व्यवसायावर मोठा परिणाम होत असल्याचेही संघटनांचे म्हणणे आहे. देशभरातील सुमारे १२ लाखांहून अधिक औषध विक्रेते आणि वितरक या आंदोलनात सहभागी होणार असल्याची माहिती संघटनेच्या पदाधिकाऱ्यांनी दिली.

नागपूरसह विदर्भातील अनेक भागांमध्ये औषध दुकाने बंद राहण्याची शक्यता असल्याने रुग्ण आणि नागरिकांमध्ये चिंतेचे वातावरण आहे. विशेषतः दीर्घकालीन आजारांवरील औषधांवर अवलंबून असलेल्या रुग्णांना अडचणींचा सामना करावा लागू शकतो. मात्र आपत्कालीन परिस्थितीत आवश्यक औषधांचा पुरवठा सुरू ठेवण्याचे आश्वासन औषध विक्रेता संघटनांकडून देण्यात आले आहे.

 

 

या पार्श्वभूमीवर Online medicine अन्न व औषध प्रशासनाने जिल्हास्तरावर नियंत्रण कक्ष स्थापन करण्याची प्रक्रिया सुरू केली आहे. रुग्णालयांशी संलग्न औषध दुकाने, २४ तास सुरू असलेली मेडिकल स्टोअर्स तसेच काही निवडक औषध विक्रेत्यांशी प्रशासनाने संपर्क साधला असून अत्यावश्यक औषधांचा पुरेसा साठा उपलब्ध ठेवण्याच्या सूचना देण्यात आल्या आहेत. जिल्हाधिकारी कार्यालय, आरोग्य विभाग, पोलीस प्रशासन आणि खासगी रुग्णालयांशी समन्वय साधून परिस्थिती नियंत्रणात ठेवण्याचा प्रयत्न केला जात आहे.औषध विक्रेत्यांच्या मते, कोविड काळात तात्पुरत्या स्वरूपात लागू करण्यात आलेल्या काही नियम शिथिलतेचा गैरवापर होत असून त्याचा फायदा ऑनलाईन फार्मसी कंपन्या घेत आहेत. त्यामुळे रुग्णांच्या सुरक्षेचा प्रश्न निर्माण होत असल्याचा दावा संघटनांनी केला आहे. केंद्र सरकारने या विषयावर ठोस धोरण जाहीर करावे आणि ऑनलाईन औषध विक्रीसाठी कडक नियमावली लागू करावी, अशी मागणी आंदोलनकर्त्यांकडून करण्यात आली आहे.दरम्यान, प्रशासनाने नागरिकांना अफवांवर विश्वास न ठेवण्याचे आवाहन केले असून आवश्यक औषधांची खरेदी आगाऊ करून ठेवण्याचा सल्ला दिला आहे. परिस्थिती हाताळण्यासाठी प्रशासन सज्ज असल्याचा दावा अधिकाऱ्यांनी केला असला तरी २० मे रोजी औषध पुरवठा आणि आरोग्य सेवांवर या बंदचा किती परिणाम होतो, याकडे सर्वांचे लक्ष लागले आहे.