अग्गंबाई सासूबाई’च्या आठवणींना उजाळा

Tejashri Pradhan छोट्या पडद्यावरील काही नाती ही केवळ मालिकांपुरती मर्यादित राहत नाहीत, तर ती कलाकारांच्या मनातही कायमची घर करून राहतात. अभिनेत्री तेजश्री प्रधान आणि ज्येष्ठ अभिनेत्री निवेदिता सराफ यांचे नाते हे त्याचेच एक सुंदर उदाहरण मानले जाते. ‘अग्गंबाई सासूबाई’ या लोकप्रिय मालिकेदरम्यान पडद्यावर सासू-सुनेची भूमिका साकारताना दोघींमध्ये निर्माण झालेला जिव्हाळा आजही तितकाच दृढ असल्याचे पुन्हा एकदा दिसून आले.

 

 

निवेदिता सराफ या झी मराठीवरील नव्या ‘कृष्णाईच्या लेकी’ मालिकेत कृष्णाईच्या भूमिकेतून प्रेक्षकांच्या भेटीला येत आहेत. या मालिकेच्या प्रमोशनल शूटच्या निमित्ताने तेजश्री प्रधान यांना पुन्हा एकदा निवेदिता सराफ यांच्यासोबत काम करण्याची संधी मिळाली. ‘वीण दोघातली हे तुटेना’ मालिकेत स्वानंदीची भूमिका साकारणारी तेजश्री नुकतीच ‘कृष्णाईच्या लेकी’च्या सेटवर पोहोचली होती. खानावळीच्या पार्श्वभूमीवर रंगलेल्या या चित्रीकरणादरम्यान दोघींनी जुन्या आठवणींना उजाळा दिला.या भेटीबाबत बोलताना तेजश्री प्रधान म्हणाल्या की, निवेदिता ताईंना भेटण्याचा प्रत्येक अनुभव विशेष असतो. ‘कृष्णाईच्या लेकी’च्या सेटवर क्रॉस प्रमोशनसाठी गेल्यानंतर ‘अग्गंबाई सासूबाई’च्या दिवसांच्या अनेक आठवणी पुन्हा ताज्या झाल्या. मालिकेच्या पहिल्या प्रोमो शूटच्या वेळी दोघींमध्ये इतके छान सूर जुळले होते की सतत सुरू असलेल्या गप्पा पाहून अभिनेते डॉ. गिरीश ओक यांनी संपूर्ण मालिकेसाठी काही गप्पा राखून ठेवण्याचा विनोद केला होता. त्या प्रसंगाची आठवण आजही मनात कायम असल्याचे त्यांनी सांगितले.तेजश्री यांनी ‘कृष्णाईच्या लेकी’ मालिकेतील कलाकार आणि तांत्रिक चमूबाबतही कौतुक व्यक्त केले. कृष्णाईच्या तीनही लेकींची भूमिका साकारणाऱ्या अभिनेत्रींसह संपूर्ण टीम अत्यंत उत्कृष्ट असल्याचे त्यांनी नमूद केले. झी मराठी वाहिनी नेहमीच वास्तववादी Tejashri Pradhan  विषय आणि भावनिक कथा प्रेक्षकांसमोर आणत असल्याचे सांगत त्यांनी निवेदिता सराफ यांच्यासोबत पुन्हा एकदा झी मराठीच्या मंचावर एकत्र येण्याचा आनंद व्यक्त केला.

 

 

 

यावेळी त्यांनी मालिकेच्या दिग्दर्शन पथकाचे, छायाचित्रण विभागाचे तसेच विशेषतः खानावळीच्या सेटच्या निर्मितीचे कौतुक केले. सेटवरील बारकावे आणि वास्तवदर्शी मांडणी प्रभावी असून प्रेक्षकांनाही ती निश्चितच भावेल, असा विश्वास त्यांनी व्यक्त केला.

‘अग्गंबाई सासूबाई’मधून प्रेक्षकांच्या मनात घर करणाऱ्या तेजश्री प्रधान आणि निवेदिता सराफ यांची ही पुनर्भेट चाहत्यांसाठीही विशेष ठरत असून ‘कृष्णाईच्या लेकी’ मालिकेबाबत उत्सुकता वाढवणारी ठरत आहे.